Slovan Bratislava ka shkarkuar dy trajnerët, Vladimir Radenkoviq dhe trajnerin fizik Srdjan Zirojeviq, të cilët nuk u paraqitën në ndeshjen ndaj Feronikelit me kërkesë të qeverisë serbe.

“Dëshirojmë t’i falënderojmë trajnerin Vladimir Radenkoviq dhe trajnerin e fitnesit Srdjan Zirojeviq për shërbimet e tyre për klubin Slovan dhe t’iu urojmë atyre gjithë të mirat në të ardhmen”, thuhet në njoftimin e Bratislavës.

Klubi sllovak fitoi ndeshjen e parë ndaj Feronikelit me rezultat 2:1, ndërsa javën e ardhshme do të luhet edhe ndeshja kthyese në stadiumin “Fadil Vokrri”.

Drejtuesit e klubit kanë njoftuar se tani janë në kërkim të një trajneri të ri, por skuadrën tani për tani do ta drejtojë ndihmës-trajneri Jan Kozak, i cili ishte në stol edhe në ndeshjen e parë ndaj Niklit.