×
  • Lajme
  • Lajme

    Kurti: Vuçiq refuzoi ofertën time bujare për Asociacionin

    Reporteri
    21 Mars 2023 | 18:04
    Kryeministri Albin Kurti. Fotografi nga arkivi.

    Kryeministri i Kosovës, Albin Kurti ka folur sërish lidhur me refuzimin e presidentit serb, Aleksandër Vuçiq për nënshkrimin e Marrëveshjes, shkruan Gazeta Online Reporteri.net.

    Në një postim në Twitter, kreu i ekzekutivit thotë se Vuçiqi refuzoi ofertën e tij, siç e quan ai bujare për vetëmenaxhimin e serbëve në Kosovë.

    “Pas refuzimit të nënshkrimit të Marrëveshjes së 27 Shkurtit dhe para se të refuzonte përsëri nënshkrimin e saj me Aneksin e 18 Marsit, Presidenti i Serbisë refuzoi ofertën time bujare të vetëmenaxhimit për serbët në Kosovë, në një Asociacion që unë do ta hartoja dhe propozoja”, ka shkruar Kurti.

    Tutje, kryeministri i vendit ironizoi me Vuçiqin për marrëveshjen mes dy vendeve.

    “A është ai Doktor “Jo”-ka, ose “Z. Nyet”?, Epo, ne e dimë që ai nuk është një doktor”, shkroi Kurti në Twitter.

    Por, çfarë do të thotë emërtimi “Z.Nyet”

    Andrei Andreyevich Gromyko ishte një politikan dhe diplomat komunist sovjetik gjatë Luftës së Ftohtë.

    Ai shërbeu si Ministër i Punëve të Jashtme (1957-1985) dhe si Kryetar i Presidiumit të Sovjetit Suprem (1985-1988).

    Gromyko ishte përgjegjës për shumë vendime kryesore mbi politikën e jashtme sovjetike derisa u tërhoq në vitin 1988.

    Në vitet 1940, ekspertët perëndimorë e quanin atë Z. Nyet (“Z. Jo”) ose “Grim Grom”, për shkak të përdorimit të shpeshtë të vetos sovjetike në Shtetet e Bashkuara.

    Ndërkaq, Ambasadori i ShbA-së në Beograd, Christopher Hill ka thënë sot se Marrëveshja e arritur mes Serbisë dhe Kosovës në Ohër është ligjërisht e detyrueshme dhe pa nënshkrim.

    Hill ka treguar se një nga elementët kyç të marrëveshjes është se detyrimet e të dyja palëve janë pjesë e procesit të integrimit evropian.

    Në anën tjetër, Përfaqësuesi i posaçëm i Bashkimit Evropian për dialogun Kosovë-Serbi, Mirosllav Lajçak theksoi se Kosova e ka obligim që menjëherë të fillojë me zbatimin e pjesës së Marrëveshjes që lidhet me formimin e Asociacionit të komunave me shumicë serbe në Kosovë./Reporteri.net/

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!