Komisioni Qendror i Zgjedhjeve ka anuluar tenderin për shtypjen e fletëvotimeve, broshurave të kandidatëve dhe listave të votuesve për zgjedhjet e 7 qershorit, shkruan Reporteri.net.
Arsyeja e anulimit të tenderit, sipas njoftimit të publikuar në platformën e-Prokurorimi, është mospranimi i asnjë oferte.
“Nuk kemi pranuar asnjë ofertë”, thuhet në njoftim.
Vlera e parashikuar e kësaj kontrate ishte 284 mijë e 506 euro dhe ishte planifikuar të jepet me procedurë të negociuar pa publikim të njoftimit të kontratës.
Afati për dorëzim të ofertave ka qenë dje.
Në zgjedhjet e kaluara, fletëvotimet janë shtypur nga kompania sllovene “Cetis”.
Në zgjedhjet lokale, kjo kompani kishte cënuar besimin në procesin zgjedhor, me një gabim teknik që e kishte pranuar edhe vetë, lidhur me fletëvotimet në Mitrovicë.
Dyshimet për parregullësi ishin ngritur për fletëvotimet e shtypura në balotazh. Shqetësimet ishin ngritur gjatë procesit të numërimit të votave në Mitrovicë.
Pas reagimeve të shumta, kompania e kishte pranuar gabimin teknik gjatë printimit të fletëvotimeve në Mitrovicë, teksa kishte mohuar çdo mundësi manipulimi.
Kompania kishte përgjegjësi të plotë për incidentin, duke theksuar se një gabim i tillë është “pothuajse i pamundur” të ndodhë në rrethana normale dhe se fletët e votimit përmbajnë elemente sigurie që nuk mund të falsifikohen./Reporteri.net
Reporteri.net është gazetë online e lajmeve nga vendi dhe bota. Qëllim kryesor ka informimin e drejtë, të paanshëm dhe të shpejtë. Reporteri.net, në pronësi të “R Media L.L.C.”, është themeluar në mars të vitit 2019 dhe drejtohet nga gazetarët Bekim Kabashi dhe Mentor Gjergjaj.
E-Mail: info@reporteri.net
Marketing: marketing@reporteri.net
Adresa: Rr. UÇK, Nr. 102/11 10000 Prishtinë, Kosovë
