Mbi tre vjet luftë në Ukrainë, disa pika kyçe janë përmendur vazhdimisht, e që pritet të përmenden edhe si pjesë e takimit të presidentit të ShBA-së, Donald Trump dhe atij ukrainas, Volodymyr Zelensky.

Çfarë është Nato dhe Neni 5?

NATO është një aleancë ushtarake prej 32 shtetesh në Evropë, Amerikën e Veriut dhe Azinë perëndimore. E krijuar si një mburojë dhe pengesë kundër Bashkimit Sovjetik, ajo është zgjeruar në dekadat pas themelimit të saj më 1949. Në thelb të saj është Neni 5, pjesë e traktatit të NATO-s që thotë se një sulm ndaj njërit prej anëtarëve të saj është sulm ndaj të gjithëve.

Për shembull, nëse dikush sulmon një vend anëtar të Natos, të gjithë anëtarët e saj duhet të vijnë në mbrojtje të tij. Ukraina aktualisht nuk është anëtare, por ka shprehur dëshirën për t’u bashkuar – gjë për të cilën Rusia kundërshton fuqishëm.

Çfarë është Krimea?

Krimea është një gadishull ukrainas në Detin e Zi, në jugun më të skajshëm të vendit. Për më shumë se një dekadë, ajo ka qenë nën pushtimin rus pasi forcat e Moskës e aneksuan atë në mënyrë të paligjshme në vitin 2014. Pozicioni i saj në vijën bregdetare të Ukrainës i jep asaj rëndësi strategjike për Rusinë.

Çfarë është Donbasi?

Donbasi është një zonë me rëndësi strategjike, e pasur me minerale dhe industri, në lindjen më të largët të Ukrainës, e përbërë nga dy provinca, Luhansk dhe Donetsk. Për pjesën më të madhe të luftës, forcat ruse dhe ukrainase kanë qenë të përfshira në një betejë rrënuese për kontrollin e rajonit. Forcat ruse kontrollojnë të gjithë Luhanskun dhe afërsisht 70% të Donetskut. Midis tyre, mbi tre milionë ukrainas vlerësohet se jetojnë nën pushtimin rus.

/BBC/Reporteri.net/