Presidenti Donald Trump tha se Libani “nuk është i përfshirë” në marrëveshjen dyjavore të armëpushimit, sipas korrespondentes së Shtëpisë së Bardhë për PBS, Liz Landers.

Presidenti i SHBA-ve raportohet t’i ketë thënë Landers se Libani nuk u përfshi për shkak të grupit Hezbollah, për të cilin ai tha se “do të merret në kontroll”.

Kur u pyet për sulmet e Izraelit ndaj Libanit, Trump iu referua situatës si “një përplasje e veçantë”.

Ndërkohë, kryetari i parlamentit të Libanit ka dënuar sulmet më të fundit izraelite si një “krim lufte i mirëfilltë”, teksa Bejruti po përballet me sulmin më të madh, vetëm pak orë pasi ishte arritur një armëpushim midis SHBA-ve dhe Iranit.

Nabih Berri tha se sulmet kishin në shënjestër periferitë jugore të Bejrutit, zona të gjera të Luginës Bekaa, Malin e Libanit, Sidonin dhe disa fshatra në jug të Libanit, duke shkaktuar vrasjen dhe plagosjen e qindra civilëve në lagje me dendësi të lartë banimi.

“Krimi i sotëm është një provë serioze për komunitetin ndërkombëtar dhe një sfidë e hapur ndaj të gjitha ligjeve, normave dhe konventave ndërkombëtare, të cilat Izraeli i shkel përmes vazhdimit të shënjestrimit të civilëve”, tha Berri.

Ai u bëri thirrje liderëve politikë, fetarë dhe civilë të Libanit që “të bashkohen në solidaritet” me viktimat, ndërsa vendi vazhdon të përballet me atë që ai e përshkroi si “brutalitetin e makinerisë izraelite të vrasjes në luftën e saj të shfarosjes kundër Libanit”.