Qarkullimi në Ngushticën e Hormuzit u pakësua të hënën, disa orë përpara fillimit të një bllokade të SHBA-së ndaj porteve iraniane, sipas të dhënave të ndjekjes së anijeve.

Faqet për ndjekjen e anijeve treguan se një cisternë e lidhur me Iranin, Auroura, ndodhej në Gjirin e Omanit pasi kishte kaluar përmes ngushticës. Anija është nën sanksione nga Shtetet e Bashkuara.

Edhe “New Future”, një cisternë në pronësi kineze që transporton produkte nafte, kaloi përmes ngushticës, sipas MarineTraffic, një faqe për ndjekjen e anijeve. Ajo ishte nisur nga një port në Emiratet e Bashkuara Arabe.

Një anije kineze për transport mallrash të thata, që tregonte Irakun si destinacion, po hynte në ngushticë nga Gjiri i Omanit.

Dhjetëra anije – shumica e tyre të operuara nga Irani – shfaqen të vendosura disa milje larg portit kryesor iranian, Bandar Abbas, i cili ndodhet pranë ngushticës.

“S i gjithë trafiku” përmes ngushticës ishte ndalur të dielën në mbrëmje, sipas Lloyd’s List Intelligence, një ofrues i të dhënave detare, pasi presidenti amerikan Donald Trump shpalli një bllokadë të ngushticës. Më pas, ushtria amerikane sqaroi se bllokada do të zbatohej për portet iraniane, jo për vetë ngushticën.

Katërmbëdhjetë anije kaluan përmes ngushticës të dielën, sipas kompanisë së të dhënave detare Kpler, prej të cilave pesë po dilnin nga Gjiri. Më e madhja ishte një cisternë në pronësi dhe operim kinez.

Dhjetë cisterna të mëdha iraniane, të ndjekura përmes imazheve satelitore, ndodhen jashtë ngushticës në Gjirin e Omanit, sipas TankerTrackers, që monitoron transportin e naftës. Këto cisterna, të cilat mbajnë ngarkesa, kanë një kapacitet të përbashkët prej 21 milionë fuçish.

Ai shtoi se një cisternë iraniane ka mbërritur në Indi me dy milionë fuçi naftë bruto iraniane, pas përjashtimit nga sanksionet të dhënë nga SHBA muajin e kaluar. Ky përjashtim, që vlente për naftën iraniane në det, skadon më 19 prill.

/Reporterilnet/