Sulmuesi i përfaqësueses së Zvicrës, Breel Embolo, ka marrë leje për të udhëtuar drejt Shteteve të Bashkuara të Amerikës dhe pritet t’i bashkohet ekipit në San Diego.
Federata Zvicerane e Futbollit ka bërë të ditur se viza e 29-vjeçarit është aprovuar, duke i dhënë fund pasigurisë disa ditore rreth pjesëmarrjes së tij me kombëtaren.
“Sapo jemi informuar që viza e Breel Embolos është aprovuar dhe ai mund të udhëtojë për në SHBA të premten”, ka njoftuar federata zvicerane, duke shtuar se sulmuesi pritet t’i bashkohet ekipit në mbrëmje sipas kohës lokale në SHBA.
Embolo kishte mbetur jashtë udhëtimit fillestar të skuadrës drejt SHBA-së për shkak të mungesës së lejes së hyrjes, duke krijuar paqartësi rreth disponueshmërisë së tij për ndeshjet e radhës.
Rishikimi i ESTA-s së Embolos – një sistem i automatizuar që përcakton nëse një vizitor ndërkombëtar mund të hyjë në SHBA pa vizë tradicionale – lidhet me një vendim të gjykatës zvicerane për një incident në të cilin ai ishte përfshirë në Basel në vitin 2018.
29-vjeçari, i cili ka shënuar 23 gola në 85 ndeshje për kombëtaren dhe ka marrë pjesë në Kupat e Botës 2018 dhe 2022, u shpall fajtor në vitin 2023 për kërcënime të përsëritura dhe iu dha një gjobë me kusht.
Embolo ishte lejuar të hynte në SHBA në qershor 2025 për ndeshje miqësore ndaj Meksikës dhe SHBA-së.
Të martën pasdite, llogaria zyrtare e kombëtares zvicerane në Instagram publikoi një foto të lojtarëve në avion me përshkrimin: “Një vend i zbrazët, por jo për shumë gjatë. Shihemi së shpejti Breel Embolo.”
Zvicra, e cila ka bazën e saj në San Diego, do të nisë fazën e grupeve më 13 qershor kundër Katarit në Santa Clara, para se të përballet me Bosnjë dhe Hercegovinën në Inglewood dhe bashkëorganizatorin Kanada në Vankuver.
