Dy zyrtarë të njohur me diskutimet që përfshijnë financuesin saudit të boksit, Turki Alalshikh, gjatë eventit të muajit të kaluar pranë Piramidave të Gizës në Egjipt, ku në qendër ishte kampioni i peshave të rënda Oleksandr Usyk, kanë bërë të ditur se SoFi Stadium në Los Angeles, është përmendur si një nga opsionet kryesore për këtë duel, përcjell Reporteri.net.
Edhe pse shumë tifozë britanikë dëshirojnë që ndeshja mes dy ish-kampionëve të botës të zhvillohet në Britaninë e Madhe, organizimi i saj në një stadium të hapur gjatë vjeshtës ose dimrit do ta ekspozonte eventin ndaj kushteve të pafavorshme atmosferike.
Ka edhe çështje të tjera që duhen zgjidhur nëse dueli zhvillohet në Kaliforni, përfshirë gatishmërinë e tifozëve britanikë për të udhëtuar në numër të madh drejt Los Anxhelosit, mundësinë e hyrjes së Furyt në SHBA dhe çmimet e biletave. Megjithatë, SoFi Stadium është i mbuluar dhe ka përvojë në organizimin e eventeve të mëdha sportive.
Stadiumi, i cili do të presë tetë ndeshje të Kupës së Botës dhe Super Bowl-in e ardhshëm, mund të përshtatet për afro 100 mijë spektatorë, ndërsa për ndeshjet e NFL-së ka kapacitet prej 70,240 ulësesh.
Sipas një burimi, preferenca është që dueli Joshua-Fury të zhvillohet në një stadium të NFL-së në një zonë të SHBA-së ku boksi gëzon interes të madh.
Turki Alalshikh e solli eventin e tij të parë të boksit në SHBA në Los Anxhelos, kur Terence Crawford mposhti Israil Madrimov për titullin WBA në kategorinë 154 paund në gusht të vitit 2024. Më pas, Crawford triumfoi edhe ndaj Canelo Alvarez në një tjetër event të Riyadh Season të mbajtur në Allegiant Stadium në Las Vegas.
Tyson Fury (35 fitore, 2 humbje dhe 1 barazim) ka luftuar më parë në Los Anxhelos, kur në vitin 2018 barazoi me Deontay Wilder pas një dueli dramatik në atë që sot njihet si Crypto.com Arena.
Anthony Joshua (29 fitore, 4 humbje) ka zhvilluar dy ndeshje në SHBA. Ai nokautoi Jake Paul në Miami në dhjetor të vitit të kaluar, ndërsa në qershor të vitit 2019 pësoi humbjen e papritur ndaj Andy Ruiz Jr. në Madison Square Garden.
Joshua, 36 vjeç, rikthehet në ring më 25 korrik në Arabinë Saudite kundër Kristian Prengës, shtatë muaj pasi i mbijetoi një aksidenti të rëndë automobilistik në Nigeri, ku humbën jetën dy miq të tij.
Ndërkohë, Fury, 37 vjeç, ka bërë të ditur se do të zhvillojë një tjetër ndeshje më 1 gusht në Dublin të Irlandës, para se të fokusohet te përballja e mundshme me Joshuan më vonë gjatë këtij viti.
BoxingScene raportoi më herët se Netflix po planifikon transmetimin e këtij eventi, ndërsa presidenti i Zuffa Boxing, Dana White, ka deklaruar se organizimi do të bëhet nga kompania e tij, pavarësisht kundërshtimeve të promotorëve të Joshuas dhe Furyt, Eddie Hearn dhe Frank Warren.
Po ashtu, është e pritshme që në këtë event të shtohen edhe disa duele të tjera të mëdha, përfshirë përballjen e mundshme mes Devin Haney dhe Keyshawn Davis, si dhe atë mes Shakur Stevenson dhe O’Shaquie Foster.
/Reporteri.net/
