Argjentina ka siguruar një vend në finalen e Kupës së Botës pas një përmbysjeje dramatike ndaj Anglisë, në një ndeshje ku “Tre Luanët” ishin shumë pranë suksesit, por kampionët në fuqi treguan edhe një herë forcën e tyre mendore.
Sfida në Atlanta nisi me shumë kujdes nga të dyja skuadrat. Pjesa e parë u karakterizua nga një duel taktik, shumë përplasje fizike dhe pak hapësira për sulmuesit. Anglia tentoi të ushtronte presion të lartë, ndërsa Argjentina u përpoq të kontrollonte ritmin përmes mesfushës dhe organizimit të Lionel Messit, shkruan Gazeta Online Reporteri.net.
Në 45 minutat e para, rastet ishin të pakta. Anglia iu afrua golit me John Stones, ndërsa Argjentina pati mundësinë më të mirë përmes Enzo Fernandezit, i cili goditi pranë traversës.
Pjesa e dytë solli një tjetër histori. Argjentina nisi më agresivisht dhe iu afrua golit, por Jordan Pickford u shndërrua në pengesën kryesore të kampionëve. Portieri anglez bëri pritje të jashtëzakonshme ndaj Nico Gonzalez, ndërsa fati ishte sërish në anën e Anglisë kur goditja me kokë e Alexis Mac Allister u ndal në shtyllë.
Megjithatë, Anglia ishte ajo që goditi e para. Goli i Gordonit në minutën e 55-të dukej se mund t’i jepte skuadrës së Thomas Tuchelit një vend në finale, pasi për një periudhë të gjatë arriti të menaxhonte epërsinë dhe të mbyllte hapësirat.
Por Argjentina tregoi atë që e ka karakterizuar në vitet e fundit: qetësinë dhe besimin deri në fund. Enzo Fernandez barazoi në minutën e 85-të me një goditje spektakolare nga distanca, duke e rikthyer ekipin në lojë.
Moment vendimtar ishte minuta e 92-të. Pas një aksioni ku Mac Allister goditi shtyllën, Lionel Messi tregoi edhe një herë vizionin e tij duke krozuar në zonë, ndërsa Lautaro Martinez shënoi me kokë për përmbysjen e madhe.
Anglia humbi një mundësi të artë për të kaluar në finale. Skuadra angleze tregoi organizim dhe disiplinë, por nuk arriti ta mbyllte ndeshjen kur kishte momentin e saj. Mungesa e efikasitetit në fazën vendimtare dhe presioni i Argjentinës në fund u bënë fatalë.
Në anën tjetër, Argjentina dëshmoi pse mbetet kampione në fuqi. Përtej cilësive teknike, skuadra e drejtuar nga Lionel Scaloni tregoi karakter, përvojë dhe aftësi për të reaguar në momentet më të vështira.
Finalja do të jetë një tjetër provë e madhe për Argjentinën, e cila tashmë kërkon të mbrojë titullin e saj, ndërsa Spanja e pret në ndeshjen e fundit të Botërorit./ Reporteri.net/
