Eliminimi dramatik i Anglisë nga Kupa e Botës në gjysmëfinale jo vetëm që solli dëshpërim të madh për djemtë e Thomas Tuchel, por u mbyll edhe me skena mjaft tensionuese pas vërshëllimës finale në Atlanta.

Në qendër të vëmendjes dhe përleshjes fizike mes lojtarëve ishte ylli i Real Madridit, Jude Bellingham, i cili u pa duke goditur me shuplakë në kokë mbrojtësin e Argjentinës, Valentin Barco. Pamjet e transmetuara në televizion treguan vetëm momentin e goditjes dhe reagimin e menjëhershëm të lojtarëve argjentinas, por një video e re e filmuar nga tribunat dhe e shpërndarë në rrjetet sociale ka zbardhur të gjithë dinamikën e ngjarjes.

Pse u nxeh Jude Bellingham? Pamjet që nuk u panë në TV
Anglia ishte në avantazh me golin e Anthony Gordon, por Argjentina arriti ta përmbiste rezultatin në minutat e fundit me golat e Enzo Fernandez dhe Lautaro Martinez, duke siguruar finalen e madhe falë edhe dy asistimeve të Lionel Messit.

Reklamë

Pas përfundimit të ndeshjes, tensioni ishte në kulm. Një video e publikuar nga media spanjolle Diario AS në platformën X, e cila mori mbi 35 milionë shikime brenda pak orësh, tregon se Bellingham fillimisht ishte i qetë dhe po përshëndetej me një nga portierët rezervë të Argjentinës.

Megjithatë, situata degradoi kur Valentin Barco, ish-lojtari i Brighton, i kaloi pranë dhe i tha diçka në vesh. Bellingham, i cili flet rrjedhshëm spanjishten për shkak të qëndrimit te Real Madridi, e kuptoi menjëherë provokimin dhe reagoi me nervozizëm duke e goditur argjentinasin pas kokës.

Reklamë

Përleshja masive dhe ndërhyrja e bashkëlojtarëve
Pas goditjes, Barco u kthye dhe e shtyu Bellinghamin, ndërsa mbrojtësi veteran Nicolas Otamendi u hodh menjëherë në sulm për të mbrojtur shokun e skuadrës. Portierët e Anglisë, James Trafford dhe Dean Henderson, ndërhynë me shpejtësi si paqeruajtës për të shmangur një përleshje edhe më të rëndë fizike.

Ollie Watkins e largoi Bellinghamin nga vendi i ngjarjes, por tensioni vazhdoi pasi në sherr u përfshi edhe mesfushori tjetër anglez, Morgan Rogers.

Bellingham ishte shënjestër e argjentinasve gjatë gjithë ndeshjes
Ky incident nuk ishte i vetmi. Gjatë gjithë gjysmëfinales në “Mercedes-Benz Stadium”, lojtarët e Argjentinës u përpoqën ta provokonin vazhdimisht anglezin. Që në minutat e para, Leandro Paredes bëri një ndërhyrje të ashpër ndaj tij, ndërsa mbrojtësi Cristian Romero u pa duke festuar në mënyrë provokuese direkt para fytyrës së Bellinghamit pas një ndërhyrjeje të suksesshme.

Pavarësisht eliminimit të dhimbshëm të Anglisë në epokën e re nën drejtimin e Thomas Tuchel, Bellingham mbylli një turne personal mjaft të fortë me 6 gola të shënuar, por ky gjest i pamenduar në fund mund t’i kushtojë atij edhe me ndonjë penalizim nga FIFA për ndeshjet e ardhshme.

Reklamë

Reklamë