Pasi kishte parashikuar më parë rreziqet e inteligjencës artificiale, Elon Musk deklaron se zhvillimi i AI-së tani është i patundshëm. Sipas tij, në vend të frikës, fokusi kryesor duhet të jetë te hyrja në një periudhë mirëqenieje absolute ku çdokush mund të ketë çdo gjë që imagjinon.

Në një intervistë të fundit për The Economist, miliarderi dhe sipërmarrësi teknologjik Elon Musk ka ndarë parashikimet e tij tronditëse por shumë optimiste për të ardhmen e inteligjencës artificiale (AI). Pyetjes mbi rreziqet e teknologjisë, Musk i është përgjigjur duke e zhvendosur të gjithë vëmendjen te mundësitë e pafundme ekonomike dhe materiale që po vijnë, përcjell Reporteri.net.

Sipas Musk, rrjedhoja më e mundshme e këtij transformimi teknologjik nuk është katastrofa, por hyrja në një “epokë të bollëkut të jashtëzakonshëm”.
“Rezultati më i mundshëm është një epokë e një bollëku të mahnitshëm, ku çdokush mund të ketë gjithçka që i shkon në mendje. Kjo mund të duket e pabesueshme sot, por ne po shkojmë drejt saj,” është shprehur ai.

Musk sqaroi se ky bollëk absolut do të jetë i mundur për të gjithë njerëzimin, me të vetmin kusht që bota të mos përballet me ngjarje shkatërruese jashtë teknologjisë, siç mund të jetë një luftë e tretë botërore bërthamore.

Filozofia e Re: “Pasi bollëku është i sigurt, shijoni udhëtimin”

I pyetur për deklaratat e tij të mëparshme ku vlerësonte një mundësi prej 10% deri në 20% që robotët të shuanin njerëzimin, Musk pranoi se rriskut nuk i iket plotësisht, por se tashmë ka zgjedhur një filozofi krejtësisht pozitive.
Një buton “Stop” do të bllokonte mirëqenien: Zhvillimi i IA-së dhe robotikës nuk mund të ndalet më. Musk theksoi se edhe sikur të ekzistonte një buton për ta ndalur atë, nuk do të kishte asnjë kuptim të shtypej, pasi do të mohohej një e ardhme me bollëk të paimagjinueshëm për çdo njeri në planet.

Shijoni udhëtimin

Meqenëse hapat e teknologjisë janë të pandalshëm, Musk u shpreh se zgjedhja më e mirë është të shijohet ky udhëtim drejt bollëkut, ndërsa punohet vetëm për të minimizuar rreziqet anësore pa e frenuar prodhimin dhe inovacionin.

IA do të tejkalojë inteligjencën njerëzore brenda pesë vitesh

Për të arritur në këtë nivel të mirëqenies dhe bollëkut të gjithanshëm, fuqia punëtore dhe mendore e AI do të rritet me hapa galopantë. Musk beson se AI do të tejkalojë inteligjencën e përgjithshme njerëzore shumë shpejt.

“Mendoj se inteligjenca artificiale mund të tejkalojë shumën e të gjithë inteligjencës njerëzore në rreth pesë vjet. Në këtë pikë, nuk do të ketë pothuajse asgjë që AI të mos e bëjë më mirë se njerëzit”, sqaroi Musk.

Ai shtoi se pas 10 vitesh njerëzit vështirë se do të jenë më në kontrollin e drejtpërdrejtë të proceseve, ashtu siç shimpanzetë nuk janë në kontroll të njerëzve sot, por kjo nuk përbën problem për sa kohë sistemi prodhon bollëk dhe mirëqenie për të gjithë.

Mbrojtja e Epokës së Bollëkut: Si do të vetërregullohen kompanitë rivale

Për të garantuar që rruga drejt kësaj epoke të re të mos dëmtohet nga incidentet e sigurisë, Musk propozoi një mekanizëm bashkëpunimi mes kompanive kryesore, duke shmangur burokratët shtetërorë që nuk e kuptojnë teknologjinë.

Modeli i propozuar nga Musk

1. Takime të rregullta: Drejtuesit e kompanive rivale të IA-së të zhvillojnë biseda javore ose dyjavore për të diskutuar sigurinë.
2. Rishikimi nga rivalët: Çdo kompanie konkurruese t’i jepet 1 deri në 2 javë kohë për të testuar modelin e ri të rivalit përpara se ai të dalë në treg.
3. Motivimi nga konkurrenca: Kompanitë konkurruese do të jenë shumë të motivuara për të gjetur çdo defect sigurie te njëra-tjetra.
4. Roli i shtetit: Qeveria do të ndërhyjë vetëm nëse një kompani refuzon të adresojë një rrezik real të zbuluar nga rivalët e saj.

Pavarësisht përplasjeve personale – përfshirë kritikat e tij ndaj CEO-s të OpenAI, Sam Altman, dhe vlerësimin për parimet e ekipit të Anthropic – Musk nërmarrjen e këtyre masave e sheh si të domosdoshme në mënyrë që njerëzimi të mbërrijë i sigurt në epokën e re të bollëkut. /Reporteri.net