Një nga kapitujt më të lavdishëm në historinë e futbollit botëror ka arritur zyrtarisht në fund. Ylli argjentinas, Lionel Messi, ka njoftuar tërheqjen përfundimtare nga futbolli ndërkombëtar me përfaqësuesen e Argjentinës, duke mbyllur një karrierë të jashtëzakonshme prej 207 paraqitjesh me fanellën e kombit të tij.

Siç raportohet nga gazeta prestigjioze britanike The Guardian, 39-vjeçari vendosi t’i japë fund rrugëtimit me “Albiceleste” pas një periudhe të gjatë reflektimi, e cila u shoqërua edhe me ngjarje të rënda në jetën e tij personale. Ndeshja e tij e fundit me fanellën bardhekaltër mbetet finalja e Kupës së Botës 2026 përballë Spanjës, shkruan Reporteri.net.

Letra emocionale e lamtumirës: “Kam dhënë gjithçka, nuk më ka mbetur më asgjë”
Në një deklaratë tejet prekëse, tetë herë fituesi i Topit të Artë ka shpjeguar arsyet e këtij vendimi të vështirë emocional.

“Ishte një vendim që më lëndoi, dhe ende më dhemb thellë në shpirt, por e kuptoj se koha ka ardhur. Ju betohem se gjithmonë dhashë maksimumin tim, jo vetëm gjatë këtyre viteve të fundit kur fituam gjithçka, por edhe përpara kësaj; gjithmonë luftova dhe lashë gjithçka në fushë për këtë fanellë, për t’ju sjellë gëzim dhe për t’ju bërë të ndiheni krenarë që jeni argjentinas përmes futbollit.

Koha po mbaron, kapitujt mbyllen, dhe ky është një kapitull që më lëndon thellësisht. E dua, e kam dashur dhe do ta dua gjithmonë të jem pjesë e kombëtares. Kam dhënë gjithçka që kisha; nuk më ka mbetur më asgjë për të dhënë dhe, përveç kësaj, po vijnë lojtarë të rinj fantastikë që e meritojnë të jenë këtu.”

Humbja e babait dhe pesha e vendimit
Sipas detajeve të bëra të ditura nga The Guardian, vendimi i Messit vjen pas një goditjeje të rëndë familjare, pas ndarjes nga jeta të babait të tij, Jorge Messi, më herët gjatë këtij muaji. 39-vjeçari kishte pranuar pas kësaj humbjeje se kishte pasur “mjaft dyshime nëse do të vazhdonte ta bënte këtë edhe për shumë gjatë”.

Një trashëgimi e papërsëritshme
Rrugëtimi i Messit me Argjentinën nisi në vitin 2005 kur bëri debutimin e tij të parë. Gjatë kësaj periudhe mbi dydekadëshe, ai kaloi nga zhgënjimet e mëdha dhe finalet e humbura, në kulmin absolut të futbollit botëror:

Kampion Bote (2022) në Katar.

Nënkampion Bote në dy raste (2014 dhe 2026).

Dy trofe të Copa America.

Tashmë, me 207 ndeshje dhe një numër të panumërt rekordesh e emocionesh të dhuruara, Lionel Messi largohet nga arena ndërkombëtare duke lënë pas një boshllëk të madh, por edhe një trashëgimi të përjetshme për futbollin argjentinas dhe atë botëror. /Reporteri.net