Aktori turk Serhat Mustafa Kiliç, i njohur edhe për rolin e tij në serialin e njohur “Ezel”, është gjetur pa shenja jete në apartamentin e tij në lagjen Kağıthane të Stambollit. Ai ishte 51 vjeç.

Sipas raportimeve, Kiliç nuk kishte komunikuar me të dashurën e tij për disa ditë, gjë që e shqetësoi atë. Ajo shkoi në apartament dhe e gjeti aktorin të palëvizshëm në divan, ndërsa më pas njoftoi autoritetet.

Policia dhe ekipet mjekësore mbërritën në vendngjarje dhe konfirmuan vdekjen e tij.

Rrethanat e sakta të vdekjes së aktorit mbeten ende të paqarta. Sipas informacionit që e dashura e tij u ka dhënë autoriteteve, Kiliç vuante nga limfoma.

Disa media turke kanë raportuar gjithashtu se aktori kishte probleme me gjëndrën tiroide, por deri më tani nuk ka konfirmim zyrtar se ndonjë prej këtyre problemeve shëndetësore ka shkaktuar vdekjen e tij.

Lajmi ka shkaktuar trishtim në industrinë e kinematografisë dhe televizionit turk, ndërsa Kiliç mbetet i njohur për publikun edhe për pjesëmarrjen e tij në “Ezel”, një prej serialeve turke që ka pasur sukses të madh edhe jashtë Turqisë.