Kanë kaluar 25 vjet nga transmetimi i parë i serialit brazilian “O Clone”, një prej produksioneve televizive që la gjurmë të veçanta në kujtesën e publikut edhe në Kosovë. I transmetuar në RTV21, seriali u shndërrua në një nga hitet më të dashura televizive të asaj kohe.
Historia e dashurisë mes Jade dhe Lucas, përplasja e kulturave braziliane dhe marokene, si dhe temat e veçanta që trajtonte, e bënë “O Clone” një fenomen televiziv që kapërceu kufijtë e Brazilit.
Në 25-vjetorin e tij, rikujtojmë pesë fakte interesante për serialin që pushtoi ekranet televizive.
Një sukses i jashtëzakonshëm edhe në Kosovë
“O Clone” nuk ishte thjesht një serial i zakonshëm për shikuesit kosovarë. Sipas një raportimi të mediumit ndërkombëtar të industrisë televizive PRODU, të publikuar më 28 korrik 2004, seriali i transmetuar në RTV21 kishte arritur afro 80 për qind të pjesëmarrjes në audiencë, sipas burimeve të TV Globo-s.
Një shifër mbresëlënëse që dëshmon ndikimin e madh që pati ky produksion te publiku në Kosovë.
Gjithçka nisi më 1 tetor 2001
Seriali u transmetua për herë të parë në Brazil më 1 tetor 2001, në televizionin Rede Globo. Episodi i fundit u shfaq në qershor të vitit 2002.
Në versionin origjinal, “O Clone” kishte gjithsej 221 episode. Ai u shkrua nga skenaristja e njohur Glória Perez, ndërsa regjinë e realizoi Jayme Monjardim.
Jade dhe Lucas, çifti që pushtoi zemrat e shikuesve
Një prej arsyeve kryesore të suksesit të serialit ishte historia e dashurisë mes Jade dhe Lucas.
Personazhet u interpretuan nga Giovanna Antonelli dhe Murilo Benício, të cilët u shndërruan në një prej çifteve më të njohura televizive të asaj kohe.
Madje, në vitin 2002, ata u vlerësuan nga edicioni hispanik i revistës People si çifti më i famshëm në botë.
Shprehjet arabe u bënë pjesë e përditshmërisë
Përveç historisë së dashurisë, seriali tërhoqi vëmendje edhe për ndërthurjen e kulturës braziliane me traditat marokene dhe ato myslimane.
Shprehje si “Maktub”, “Inshallah” dhe “Haram” u përhapën gjerësisht mes shikuesve dhe për shumë njerëz u bënë pjesë e fjalorit të përditshëm.
Kjo ishte një prej veçorive që e dalloi “O Clone” nga shumë seriale të tjera të kohës.
U transmetua në më shumë se 90 shtete
Suksesi i “O Clone” nuk u kufizua vetëm në Brazil. Sipas arkivit zyrtar të Globo-s, seriali u shit në më shumë se 90 shtete të botës.
Ai pati sukses në vende të ndryshme, përfshirë Kosovën, Shqipërinë, Serbinë dhe Rusinë.
25 vjet më vonë, “O Clone” mbetet një prej serialeve që publiku kosovar e kujton me nostalgji. Përmes transmetimit, kjo histori braziliane u bë pjesë e kujtimeve televizive të një brezi të tërë, duke dëshmuar se disa produksione mbeten të paharrueshme edhe shumë vite pas transmetimit të tyre.
