Zyra e Rregullatorit të Energjisë Elektrike ka marrë vendim për shkyçje nga rrjeti elektrik, hidrocentralin ‘Lumbardhi 2’ në Deçan.

Pavarësisht që nuk i plotësonte kushtet për operim, ky hidrocentral deri tash ka qenë i kyçur në këtë rrjet.

Rregullatori për Energji, thotë se në mbledhjen e fundit, bordi ka marrë këtë vendim deri në përmbushjen e kushteve të licencimit

Për këtë kishte bërë kërkesë edhe ministri i Mjedisit dhe Planifikimit Hapësinor, Fatmir Matoshi.

Ai ka thënë se e ka informuar vetë ZRRE-në, që kompania “KelKos Energy” nuk i plotëson kushtet ligjore për të operuar me hidrocentralet në Lumbardh të Deçanit, raporton KTV.

Sipas Fatmir Matoshit, ministër i Mjedisit, pavarësisht që këto hidrocentrale nuk e kanë ndalur veprimtarinë e tyre, ato operojnë pa leje mjedisore.

Ndërtimi i hidrocentraleve në vazhdimësi është kundërshtuar nga banorët që jetojnë fshatrave përreth lumenjve, sidomos ata që merren me bujqësi.

Mirëpo, kundërshtimet e banorëve asnjëherë nuk janë marrë parasysh.