Festivali i Këngës në RTSH shkaktoi bujë dhe komentet ende vijojnë. “Me një tekst të tillë dikur nuk të linin të këndoje as në hale.” Kështu e ka quajtur poeti Petrit Ruka, këngën ”Me tana” të këngëtares Elvana Gjata.

Përmes një postimi në Facebook, Ruka është shprehur se kjo këngë është një tmerr artistik. Sipas tij, organizatorët e këtij festivali duheshin “arrestuar” në sallë për krim ndaj gjuhës shqipe dhe fyerje të rëndë të dinjitetit të kulturës kombëtare shqiptare.

“Turpi e mbuloftë emrin e atyre regjisorëve, udhëheqësve artistikë, prezantuesve, redaktorëve, kompozitorëve që kanë emrin në titrat e këtij produksioni me tekste të tilla. Një ditë bota do të qesh me të madhe me idiotësinë e tyre. Tallja e brezave që vijnë do t’i shoqërojë edhe aty ku do te jenë, në varr”, shprehet ai ndër të tjera.

Postimi i plotë i Rukës:

TMERR ARTISTIK DHE NJË URGJENCË KOMBËTARE

Jap e marr ta kuptoj këtë tekst të ndyrë që më doli para dhe nuk ia dal dot. Kjo quhet këngë…dhe qenka trasmetuar në festival. Me një tekst të tillë dikur nuk të linin të këndoje as në hale.

Shijoheni.

Teksti: Elvana Gjata

Këndon: Elvana Gjata

Kupton: Elvana Gjata

5 milionë shqiptarë paguajnë RTSH për ndyrësi të tilla dhe na na na-n e saj…

Tmerr artistik.

Organizatorët e këtij festivali duheshin “arrestuar” në sallë për krim ndaj gjuhës shqipe dhe fyerje të rëndë të dinjitetit te kultures kombëtare shqiptare.

Duhet hartuar me ngut një ligj i posaçëm që këngët në Festivalin e RTSH duhet të vijnë patjetër në standard dhe të kenë poshtë firmën aprovuese të dhjetë poetëve më të mirë të vendit. Unë vetë nuk do ta pranoja këtë tekst edhe sikur të vinte me muzikën e Ennio Morricone-s.

“Ti kam fal ty me tana

Me tana o me tana

Dashni me fal

O kush ka me ma nal?

A ma thua edhe sa

Duhet të pres ty me të pa

Ta di, dua ta di dhe sa

Kohën ndale, ndale

Të shkoj ngadale ndale

O më ngadale ndale

Na na na na na…”

………………………… Turpi e mbuloftë emrin e atyre regjisorëve, udhëheqësve artistikë, prezantuesve, redaktorëve, kompozitorëve që kanë emrin në titrat e këtij produksioni me tekste të tilla. Një ditë bota do të qesh me të madhe me idiotësinë e tyre. Tallja e brezave që vijnë do t’i shoqërojë edhe aty ku do te jenë, në varr.