Ministri i Kulturës, Hajrulla Çeku, ka publikuar pamjet se si do të duket Lokaliteti Arkeologjik në sheshin e Lidhjes së Prizrenit, hapësirë kjo që ai e quajti tejet të rëndësishme të trashëgimisë kulturore, raporton gazeta online Reporteri.net.

Çeku siguroi se projekti i prezantimit të këtij lokaliteti është përgatitur me qasje gjithpërfshirëse, teksa shton se prezantimi final i këtij projekti do të jetë reflektim i një zgjidhjeje të përbahskët.

“Prezantimi dhe promovimi i Lokalitetit Arkeologjik si një lokalitet me rëndësi historike, shkencore, kulturore dhe edukative, synon që të ngrisë vetëdijen për rëndësinë e këtij lokaliteti si dhe të promovojë vlerat kulturore nëpërmjet zhvillimit të turizmit kulturor”, shkroi Çeku në Facebook.