Të stresuar, duke lëvizur pa fund nëpër rrjete sociale dhe asnjëherë plotësisht të kënaqur? Murgu budist tibetian Yongey Mingyur Rinpoche mund të ketë përgjigjet e duhura.

Sipas matjeve shkencore, The Guardian shkruan, se Mingyur konsiderohet si një nga njerëzit më të lumtur në botë. Skanimet e trurit kanë treguar nivele të jashtëzakonshme aktiviteti në korteksin e tij të majtë parabllor — zona përgjegjëse për ndjenjat e gëzimit dhe entuziazmit. Për më tepër, testet mjekësore zbuluan se kur ai ishte 41 vjeç, truri i tij ngjante me atë të një 33-vjeçari, përcjell Reporteri.net.

Këto janë 9 këshillat dhe praktikat kryesore që ai sugjeron për një jetë më të qetë dhe të përmbushur:

Më pak rehati sipërfaqësore, më shumë përmbushje: Kur ndihemi të mërzitur apo të vetmuar, shpesh kërkojmë stimulim të menjëhershëm në telefon ose ushqim. Në vend që të mbingarkoheni me stimuj të shpejtë, fikni ekranet dhe pranoni këto emocione pa u përpjekur t’i mbuloni me konsum të çastit.

Pranoni ndryshimet (madje edhe ato të frikshmet): Ndryshimi nxit fleksibilitetin mendor. Nuk keni nevojë për ngjarje ekstreme; mjafton të provoni ndryshime të vogla të përditshme, si zgjedhja e një rruge të re gjatë kthimit nga puna apo gatimi me një përbërës të papërdorur më parë.

Nuk nevojitet qetësi absolute për të gjetur paqen: Meditimi mund të bëhet kudo dhe me çdo gjë. Zhurma e trafikut apo bisedat me zë të lartë nuk duhet të jenë pengesë; ato mund të kthehen në një pikë mbështetëse për t’u fokusuar dhe për të ndërtuar qetësi të brendshme.

Përdorni “tri shtyllat”: Filozofia bazohet te këndvështrimi, meditimi dhe zbatimi. Ndryshimi vjen nga krijimi i zakonit të përditshëm për të vërejtur cilësitë pozitive te njerëzit dhe për t’i zbatuar ato vazhdimisht në praktikë.

Mirënjohje për gjëra konkrete: Në vend të listave të përgjithshme, përqendrohuni në detaje shumë specifike të jetës së përditshme — si ndjesia e një karrigeje të rehatshme, një çati mbi kokë apo një moment i thjeshtë qetësie.

Qielli nuk ndryshon, pavarësisht stuhisë: Kur përballeni me ankth apo panik, mos u mundoni ta luftoni me forcë, pasi rezistenca vetëm e forcon atë. Kujtoni se stuhitë emocionale janë si retë që kalojnë, ndërsa thelbi juaj mbetet i pandryshuar.

Frymëmarrja për lumturi afatgjatë: Kënaqësia nga paratë apo ndryshimet materiale zbehet shpejt dhe rikthehet në pikën zero. Praktikimi i rregullt i frymëmarrjes së qetë dhe i ndjenjës së dhembshurisë zhvendos bazën e brendshme të lumturisë në mënyrë të qëndrueshme.

Zemërimi është si vesa në bar: Ndërgjegjësimi funksionon si rrezet e diellit. Kur ndieni zemërim të papritur, mjafton ta dalloni atë për një sekondë dhe të mos reagoni me impulsivitet; sapo e kapni me vetëdije, emocioni fillon të zbutet vetvetiu.

Ndihma ndaj të tjerëve: Mbështetja e njerëzve në nevojë krijon një ndjenjë të thellë dhe të qëndrueshme përmbushjeje, e cila nuk mund të krahasohet me kënaqësitë e thjeshta materiale.