Diplomacia serbe ka shfaqur tendenca për ta destabilizuar Kosovën, kanë qenë fjalët e drejtorit të Agjencionit Kosovar për Inteligjencë, Shpend Maxhuni.
Ka qenë kryetari i Komisionit Faton Topalli, që është deputet i PSD, i cili ka transmetuar fjalët e drejtorit të AKI-së pas raportimit në Komision, shkruan Reporteri.net.
“Ky takim hyn në mbledhjet e rregulla të planifikuara te drejtorit të AKI-se. Kemi diskutuar sigurinë në Kosovë. Sipas raporteve të drejtorit, gjendja e sigurisë në Kosovë është bukur stabile por ka tendenca për destabilizim. AKI ka informuar Presidentin dhe Kryeministrin”, ka thënë Topalli.
Ndër të tjera, Topalli thekson se Maxhuni i ka njoftuar se informacionet rreth këtyre tendencave kanë shkuar edhe tek kryeministri dhe presidenti.
“Informacionet për përpjekjet për destabilizim janë edhe publike nëse i shkojmë me vëmendje veprimet e Republikës se Serbisë. AKI ka për detyrë të raportojë te kryeministri dhe tek kryetari i vendit por edhe komisionit. Natyrisht tendencat e tilla të Serbisë janë evidente dhe të dukshme”, shtoi ai.
Sidoqoftë, vlen të theksohet se pas këtij raportimi është nxjerrë konkludim se gjendja e sigurisë në Kosovë është bukur stabile./Reporteri.net