Trupi Gjykues i Gjykatës Speciale e ka caktuar më 16 shtator në orën 10:00, datën e shpalljes së aktgjykimit në çështjen gjyqësore ndaj katër ish-krerëve të Ushtrisë Çlirimtare të Kosovë: Hashim Thaçit, Kadri Veselit, Rexhep Selimit dhe Jakup Krasniqit.
Specialja në një njoftim mbrëmë përcolli arsyetimin e Trupi Gjykues për shtyrjen përfundimtare të këtij vendimi, për shpalljen e të cilit fillimisht pati afat deri më 19 maj, e më pas, duke u thirrur në kompleksitetin e rastit, ai u shty deri më 20 korrik.
Specialja tha se Trupi Gjykues e ka zgjatur kohën e nevojshme për përfundimin e kuvendimeve. U tha se kjo u bë në përputhje me rregulloren e gjykatës, për shkak të vëllimit të madh të provave të administruara dhe kompleksitetit të procesit gjyqësor.
“Në urdhrin për caktimin e datës, Trupi Gjykues shpjegoi se koha e nevojshme për kuvendimet ishte zgjatur në përputhje me Rregulloren, për shkak të vëllimit të madh të provave të marra dhe kompleksitetit të procesit gjyqësor, dhe se kjo zgjatje përligjej nga nevoja për të bërë një vlerësim të arsyetuar, tërësor dhe të drejtë të dokumentacionit të çështjes”, thuhet në njoftimin e Gjykatës Speciale.
Fillimisht, Trupi Gjykues kishte afat deri më 19 maj për të shpallur vendimin. Por, duke u thirrur në kompleksitetin e rastit, ai vendosi ta shtynte këtë afat deri më 20 korrik 2026 dhe tani vendosi përfundimisht për 16 shtator.
Thaçi, Veseli, Krasniqi dhe Selimi, akuzohen për vepra si vrasje, torturim dhe përndjekje, gjoja të kryera gjatë viteve 1998-’99 gjatë luftës për pavarësimin e Kosovës nga Serbia.
Që të katërtit i kanë mohuar këto akuza dhe janë deklaruar të pafajshëm për akuzat që përfshijnë rreth 155 viktima.
Prokurorët kanë kërkuar që ata të shpallen fajtorë dhe secili të dënohet me nga 45 vjet burgim për krimet e pretenduara.
