Presidenti Donald Trump porositi të hënën ushqim të McDonald’s në Zyrën Ovale, në një përpjekje për të promovuar uljen e taksave mbi bakshishet. Kur u pyet nëse stafi i Shtëpisë së Bardhë jep bakshishe të mira, ai i dha shoferes një kartëmonedhë që dukej të ishte 100 dollarë.

E veshur me një bluzë të kuqe me mbishkrimin “DoorDash Grandma”, Sharon Simmons nga Arkansas trokiti në derë duke mbajtur dy qese me ushqim të shpejtë, ndërsa mediat po e përcjellnin momentin. Trump i hapi derën dhe më pas iu përgjigj pyetjeve të gazetarëve për tema të ndryshme, në praninë e Simmons, e cila tha se ka kursyer një shumë të konsiderueshme parash pasi taksat mbi bakshishet u hoqën në janar.

Me kontrollin e Kongresit që pritet të vendoset në zgjedhjet e ndërmjetme të nëntorit, këshilltarët e Trump kishin shpresuar që këtë vit të përqendroheshin te promovimi i fuqisë së ekonomisë amerikane. Por lufta SHBA, Izrael, Iran ua ka vështirësuar këto përpjekje, sidomos pasi rritja e çmimeve të naftës ka shtuar kostot e karburantit dhe ka zbehur efektet e uljes së taksave mbi bakshishet, pagesave të pensioneve nga Sigurimet Shoqërore, pagesave për orët shtesë, interesit të kredive për makina dhe faturave të taksave shtetërore e lokale, të cilat ishin pjesë e paketës së mbështetur nga republikanët vitin e kaluar.

Madje, muajin e kaluar, DoorDash dhe kompani të tjera që mbështeten te shoferët e pavarur të dërgesave ndërmorën masa për t’u përballur me rritjen e çmimeve të karburantit.

Kur një gazetare e pyeti Simmons nëse Shtëpia e Bardhë jep bakshishe të mira, ajo u përgjigj: “Hmm, ndoshta.”

Trump ndërhyri dhe tha: “Prit”, më pas futi dorën në xhep dhe i dha asaj atë që dukej si një kartëmonedhë 100 dollarëshe.

“Faleminderit që ma kujtove”, tha ai.

Më vonë, kur u pyet për bakshishin në Fox News, Simmons tha: “U kujdes mirë për mua.” Por ajo nuk tregoi shumën që kishte marrë, duke shtuar: “Nuk flas për para.”

Simmons shmangu me diplomaci edhe disa pyetje të Trump para gazetarëve.

Trump e pyeti: “A mendon se burrat duhet të garojnë në sportet e grave?”

Ajo u përgjigj: “Nuk kam ndonjë mendim për këtë… unë jam këtu për taksën mbi bakshishet.”

Ai e pyeti edhe nëse kishte votuar për të. Me një buzëqeshje, Simmons tha: “Ndoshta.”