Nigeria ka shpallur tri ditë zie kombëtare pas rrëzimit të një avioni ushtarak në shtetin Ondo, në jug të vendit, ku humbën jetën 32 persona. Presidenti Bola Tinubu shprehu ngushëllimet për familjet e viktimave dhe urdhëroi nisjen e një hetimi të plotë për të përcaktuar shkaqet e aksidentit.
Avioni, me 25 pasagjerë dhe shtatë anëtarë ekuipazhi në bord, ishte nisur nga Benini drejt Lagosit në një mision rutinë. Sipas autoriteteve, ai humbi kontaktin pak pas nisjes dhe më vonë u konfirmua se ishte rrëzuar pranë një baze detare në Igbokoda, në shtetin Ondo.
Ministri i Aviacionit, Festus Keyamo, tha se avioni, me numër regjistrimi NGR 931, ishte nisur në orën 09:13 dhe se përpjekjet për të vendosur kontakt me të përmes radios kishin dështuar. Më pas, ekipet e kërkim-shpëtimit konfirmuan vendndodhjen e rrëzimit pranë bazës detare.
Një banor i zonës i tha BBC-së se avioni ishte rrëzuar pranë një zone kënetore. Në vendngjarje u gjetën rroba dhe këpucë, ndërsa nga zona mund të shihej tym që ngrihej në ajër.
Presidenti Tinubu urdhëroi që flamujt kombëtarë të valëviten në gjysmështizë në të gjithë vendin gjatë periudhës së zisë. Ai e cilësoi ngjarjen si një moment të dhimbshëm për Forcat e Armatosura dhe për të gjithë kombin, duke vlerësuar sakrificën e personelit të Forcave Ajrore Nigeriane.
Avioni i rrëzuar, i përshkruar si një ATR-42, është një model që, në varësi të konfigurimit, mund të transportojë rreth 30 deri në 50 pasagjerë.
Autoritetet ende nuk kanë bërë publike identitetet e viktimave. Emrat e oficerëve pritet të publikohen pasi familjet e tyre të jenë njoftuar zyrtarisht.
Forcat Ajrore Nigeriane kanë një rol të rëndësishëm në operacionet ushtarake kundër grupeve të armatosura dhe në përpjekjet për të përballuar pasigurinë në disa pjesë të vendit.
Ky është ndër aksidentet ajrore më vdekjeprurëse në Nigeri në vitet e fundit. Në maj të vitit 2021, shefi i ushtrisë nigeriane, gjenerallejtënant Ibrahim Attahiru, humbi jetën së bashku me 10 oficerë të tjerë në një aksident ajror në shtetin Kaduna, në veriperëndim të vendit.
