Ganja e PDK-së kërkon shkarkimin e zv/ministres serbe, pas statusit për bombardimet e NATO-s

Deputetja e PDK-së, Ganimete Musliu ka reaguar lidhur me publikimin e zv/ministres serbe në Qeverinë e Kosovës, Vesna Mikiq.


Mikiq duke folur për 20 vjetorin e bombardimeve në Serbi, tha se u bë qëllimisht gjenocid i planifikuar nga NATO.

E për këtë deklaratë të saj, deputetja Musliu kërkon që kryeministri Ramush Haradinaj ta shkarkojë atë menjëherë.

“R E A G I M. Kjo zv.Ministre nuk guxon të paguhet nga taksat tona. Kryeminister Haradinaj, shkarkoje menjëherë! Boll më kemi toleruar por jo deri në pafundesi. Ndytësirat si kjo nuk i shërbejnë as serbëve të Kosovës. Le të shkoj të jetoj në ‘shtetin e saj sovran’”, ka shkruar Musliu në Facebook.

Mbetet të shihet nëse Haradinaj do të merr masa ndaj zv.ministres serbe dhe ta plotëson kërkesën e deputetës Musliu.

Kujtojmë se Mikiq është zv.ministre e Drejtësisë, dikaster ky që drejtohet nga Abelard Tahiri, bashkëpartiak i deputetes Musliu. /Reporteri.net/.