Kryeministri i Kosovës, Ramush Haradinaj, në një takim lamtumirës me ambasadorin bullgar, Nedialtcho Dimitrov Danatchev, ka thënë se Bullgaria i ka dhënë përkrahje të plotë Kosovës në rrugëtimin e saj euro-atlantik.

Haradinaj në llogarinë e tij në Facebook, ka shkruar se ambasadorit Danatchev i ka shprehur konsideratat për punën e palodhshme dhe bashkëpunimin për thellimin e marrëdhënieve bilaterale ndërmjet dy vendeve.

Ndër të tjera Haradinaj ka shkruar se me ambasadorin Danatchev kanë biseduar edhe për lojën mes Kosovës dhe Bullgarisë, ku tha se i ka uruar fat dy kombëtarëve.

“Bullgaria i ka dhënë përkrahje të plotë Kosovës në rrugëtimin e saj euro-atalantik dhe do të vazhdojë të jetë përkrahëse e fuqishme e vendit tonë në procesin e integrimit në BE. Në takim lamtumirës me ambasadorin bullgar, Nedialtcho Dimitrov Danatchev, i shpreha konsideratat e mia për punën e palodhshme dhe bashkëpunimin për thellimin e marrëdhënieve bilaterale ndërmjet dy shteteve tona. Kënaqësi të bashkëbisedonim edhe për lojën e sontme në futboll në mes të Kosovës dhe Bullgarisë, me ç’rast i dëshiruam fat të dy kombëtareve”, ka shkruar ai.