×
  • Lajme
  • Lajme

    Lëvizja Panevropiane e Austrisë për vizat: Zbatim të menjëhershëm të lëvizjes së lirë për kosovarët

    Reporteri
    28 Mars 2019 | 16:01

    Pas votimit të suksesshëm në Parlamentin Evropian të raportit të paraqitur nga eurodeputeja Tanja Fajon, ka reaguar Lëvizja Panevropiane e Austrisë, e cila përmes një komunikate sot për shtyp, ka kërkuar urgjentisht liberalizimin e vizave për qytetarët e Republikës së Kosovës.


    “Për të gjitha vendet e Evropës Juglindore që ende nuk janë anëtare të BE-së, lëvizja e lirë pa viza ka kohë që është bërë realitet”, deklaroi Stefan Haböck, përfaqësues për marrëdhënie ndërkombëtare i Lëvizjes Panevropiane të Austrisë.

    Sipas tij, vetëm qytetarët e Kosovës po konsiderohen disi si njerëz të klasit të dytë.

    Në komunikatën e lëshuar për medie thuhet se Bashkimi Evropian i ka paraqitur Republikës së Kosovës një listë të gjatë të kritereve për të marrë liberalizimin e vizave. Kosova i ka përmbushur të gjitha kriteret, edhe Komisioni Evropian ka konfirmuar përmbushjen e këtyre kritereve dhe ka shqyrtuar situatën e sigurisë. Tani kërkohet veçanërisht nga shtetet anëtare të BE-së që të vendosin për këtë, edhe pse tek të cilat po gjinden justifikime të reja për të mos dhënë regjimin e premtuar të lëvizjes pa viza.

    Gjatë presidencës austriake të BE-së, Lëvizja Panevropiane e Austrisë ka pritur një zbatim konkret të lëvizjes pa viza për kosovarët.

    “U premtua se nëse Kosova plotëson kriteret, vjen liberalizimi i vizave. Premtimi nuk u mbajt. Kjo nuk i bën mirë besueshmërisë së shteteve anëtare të BE-së,“ deklaroi Rainhard Kloucek, Sekretar i Përgjithshëm i Lëvizja Panevropiane e Austrisë, ndaj qëndrimit bllokues të shumë qeverive evropiane për këtë çështje.

    Lëvizja Panevropiane e Austrisë është organizatë austriake jo partiake e themeluar në vitin 1922 nga Richard Coudenhove-Kalergi, si lëvizja më e vjetër evropiane e shtrirë në 24 organizata dhe në 22 vende të ndryshme evropiane.

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!