Në ditën kur pikërisht 20 vjet më parë avionët e NATO-s filluan bombardimin e Republikës Federale të Jugosllavisë, gjashtë shqiptarë ngritën flamurin e Shqipërisë në Urën Varadin, Novi Sad, transmeton Reporteri.net

Sipas dëshmitarëve okularë, shqiptarët, pjesëmarrës në gjysmë maratonën që u mbajt dje në Novi Sad, ndërkohë që po vraponin ngritën flamurin kuq e zi në mes të urës duke bërë edhe fotografi më pas.

Disa serbë të cilëve u kishte penguar ky veprim thonë për mediat serbe se pas kësaj e kishin thirrur policinë.

“Unë  isha duke shkuar në protestën për shënimin e 20 vjetorit të bombardimeve të NATO-s, kur nga vetura pashë gjashtë burra në urë duke valëvitur flamurin shqiptar, duke qeshur dhe bërë fotografi. Ishte e qartë se bëhej fjalë për provokim”, tha Sasha Vujiq.

Ai rrëfen se menjëherë ndali veturën dhe e thirri policinë. Sipas fjalëve të këtij dëshmitari policia erdhi  dy automjete patrulluese dhe i shoqëroi  gjashtë shqiptarët për në stacionin policor.

Siç raportohet pesë prej tyre nuk kishin dokumente identifikuese  gjersa njëri prej tyre u prezantua si një prej shefave të policisë në Tiranë. /Reporteri.net