Zëvendëskryeministri dhe ministri i Jashtëm i Kosovës, Behgjet Pacolli, pas bllokimit të punës në një furrë në pronësi të një shqiptari në Beograd, ka pohuar se në raport me realizimin e të drejtave të shqiptarëve që jetojnë në këtë vend, Serbia ka karakteristika të kombinuara të regjimeve kriminale, shteteve të dështuara dhe regjimeve totalitare.

“Sot serbet në Beograd kanë bllokuar punën e një furre pronë e një shqiptari. Në raport me realizimin e të drejtave të shqiptarëve që jetojnë në këtë vend, Serbia ka karakteristika të kombinuara të regjimeve kriminale, shteteve të dështuara, dhe regjimeve totalitare”, ka thënë Pacolli.

“Mentaliteti i tillë paraqet një ndërthurje të fashizmit nën petkun paramilitar dhe bandave kriminale bashkë. Demokracia nuk vlen për jo serbet në këtë vend, dhe nuk e kuptoj pse synojnë t’i bashkohen BE-së!”, ka shtuar ai më tej.

Reporteri kishe raporuar se dhjetëra banorë të një lagjeje në Beograd, i kishin bllokuar furrën e bukës një shqiptari, vetëm pse ai ishte shfaqur në Facebook, me një foto ku e bënte shqiponjën.

Furra e tij, që mban emrin ‘Roma’, ishte mbushur me flamuj serb, ku protestuesit kishin kënduar edhe këngë patriotike serbe. E gjithë kjo sipas tyre, sepse pronari shqiptar i furrës së bukës kishte bërë shqiponjën që nënkupton Shqipërinë e Madhe, që në fakt, shqiponja e tillë, është vetëm simbol kombëtar shqiptar, i vendosur edhe në flamurin zyrtar të Shqipërisë. /Reporteri.net.