Të enjten në Prishtinë është mbajtur një protestë masive kundër verdiktit të Gjykatës Speciale që dënoi me burgim ish-krerët e UÇK-së. Pak orë pas, objekti i Qeverisë së Kosovës është ndriçuar me flamurin e UÇK-së.
Fotografia nga oborri i Qeverisë së Kosovës është publikuar asamblistja e Lëvizjes Vetëvendosje në Prishtinë, Berita Abazi, që është edhe këshilltare politike e kryeparlamentares Albulena Haxhiu.
Vendosja e flamurit vjen në një kohë kur në Kosovë po zhvillohen aktivitete dhe protesta në mbështetje të ish-drejtuesve të UÇK-së që po përballen me proces gjyqësor në Dhomat e Specializuara të Kosovës në Hagë.
Ndërsa, PDK-ja po kërkon nga Qeveria ndryshimin e ligjit për Gjykatën Speciale.
Ish-gjenerali Wesley Clark, ka kërkuar që Hashim Thaçi dhe të tjerët të kthehen sa më shpejt në Kosovë.
Ai tha se Europa duhet të respektojë popullin e Kosovës, ndërsa theksoi se, sipas tij, Hashim Thaçi është “viktimë” e një procesi të gabuar.
“Europa duhet të respektojë popullin e Kosovës, që luftuan për parimet. Millosheviçi ka qenë përgjegjës. Ai ishte një person që donte të promovonte spastrimin etnik. Hashim Thaçi është viktimë dhe kjo është gabim”, u shpreh Clark.
Ish-gjenerali amerikan tha gjithashtu se kishte kërkuar prova lidhur me akuzat ndaj Thaçit, por sipas tij, nuk kishte parë prova të tilla.
Clark iu referua edhe periudhës së luftës në Kosovë, duke theksuar se në atë kohë, sipas tij, kishte prova për veprime vrastare të Ish-Jugosllavisë dhe se autoritetet kishin ndërmarrë hapa ndaj personave të dyshuar për krime lufte.
Ai theksoi se Tribunali i Hagës për krimet e luftës në ish-Jugosllavi ishte më i drejtë se Gjykata Speciale, pasi sipas tij, vendimet e saj bazoheshin në prova reale.
“Europa duhet të respektojë popullin e Kosovës, që luftuan për parimet. Millosheviçi ka qenë përgjegjës. Ai ishte një person që donte të promovonte spastrimin etnik. Hashim Thaçi është viktimë dhe kjo është gabim. Unë kam kërkuar provat, dhe nuk kishte prova. Të paktën në dijeninë time.
Mendoj se ishte, sepse në atë kohë kishte prova të vërteta për veprimet e gabuara që u bënë. Ne parashtruan informacione në atë kohë. Arrestuan disa kriminelë lufte. Mendoj se gjykata ka marrë fund. Le të rikthejmë Hashim Thaçin dhe të tjerët në Kosovë, dhe të kthehen në jetën e tyre. Të ecim përpara. Hashim Thaçi ka kaluar 5 vite në paraburgim. Mjaft me kaq“, tha ai, në Klan News.
I pyetur nëse do ishte gati për të dëshmuar në Apel në favor të ish-krerëve të UÇK-së, ish-gjenerali dha këtë përgjigje:
“Do e vlerësoja shumë nëse do më ftonin për të shpjeguar se çfarë ndodhi“, tha ai.
Policia e Kosovës ka njoftuar se protesta e mbajtur të enjten në orën 16:00 në sheshin “Skënderbeu” në Prishtinë ka përfunduar në mënyrë të qetë dhe pa incidente.
Sipas Policisë, për mbarëvajtjen e protestës janë ndërmarrë masat e nevojshme policore, me qëllim ofrimin e sigurisë, ruajtjen e rendit dhe qetësisë publike, si dhe menaxhimin e situatës në aspektin e sigurisë.
Protesta ka përfunduar rreth orës 17:50.
Policia ka falënderuar organizatorët dhe mijëra qytetarët pjesëmarrës për, siç ka thënë, “qytetarinë, kulturën dhe sjelljen paqësore” të treguar gjatë protestës.
Në veçanti, Policia ka vlerësuar respektimin e udhëzimeve të dhëna nga zyrtarët policorë, përfshirë ato që lidhen me qarkullimin në trafikun rrugor.
“Protestimi në mënyrë të qetë, sjellja e përgjegjshme dhe respektimi i udhëzimeve policore kontribuuan në mbarëvajtjen e qetë dhe të sigurt të protestës paqësore”, thuhet në njoftimin e Policisë së Kosovës.
Sot në Prishtinë, është zhvilluar një protestë masive kundër dënimit të ish-krerëve të UÇK-së, nga Gjykata Speciale.
Pamje nga kjo protestë ka ndarë kryetari i Partisë Demokratike të Kosovës, Bedri Hamza.
“Populli i Kosovës nuk e pranon padrejtësinë. Jo në emrin tim! Jo në emrin tonë!”, ka shkruar Hamza.
Mijëra qytetarë kanë protestuar sot në Prishtinë.
Disa prej tyre që u lejuan t’i fusin në Qeveri për t’i dorëzuar 120 pako me projektligjin për ndryshimin e ligjit për Gjykatën Speciale, një tjetër e la edhe një porosi tjetër: uniformën e Ushtrisë Çlirimtare të Kosovës të varur skaj hyrjes kryesore të Qeverisë.
Qytetarë të shumtë po protestojnë çdo natë në Prishtinë, që prej 16 shtatorit, kur Hashim Thaçi, Kadri Veseli, Rexhep Selimi dhe Jakup Krasniqi u dënuan me gjithsej 81 vjet burgim.
Jashtë gjykatës në Hagë dhe në sheshin kryesor të Prishtinës, ku ishin mbledhur qindra njerëz për ta pritur vendimin, ata mbetën heronj luftës së përgjkshme për pavarësinë e vendit.
Shfuqizimi ose ndryshimi i ligjit për Gjykatën Speciale, është njëra nga kërkesat e protestave të vazhdueshme.
Mijëra qytetarë morën pjesë në protestën e sotme në Prishtinë, në mbështetje të ish-krerëve të Ushtrisë Çlirimtare të Kosovës.
Fjalimet e pjesëtarëve të UÇK-së dhe familjarëve të tyre sollën emocione të forta te të pranishmit.
Mes tyre, nuk i përmbajti dot lotët as një pjesëtar i Policisë së Kosovës që po kujdesej për rendin gjatë protestës. Ai u pa duke qarë për disa momente, i prekur nga fjalimet në shesh.
Tashmë ka përfunduar protesta në Prishtinë, e zhvilluar kundër dënimit të ish-krerëve të UÇK’së, nga Gjykata Speciale.
Pas përfundimit të saj, protestuesit kanë dorëzuar 120 pako të cilat mbajnë projektligjin për ndryshimin e ligjit të Speciales.
Nga pamjet shihet teksa pakot dërgohen në Qeveri, nga Çlirim Haziri, dhe fëmijët e dëshmorëve.
Një qytetar është shfaqur me një pankartë me një karikaturë të kryetarit të Trupit Gjykues, Charles Smith, i cili më 16 shtator shpalli aktgjykimin dënues ndaj katër ish-krerëve të Ushtrisë Çlirimtare të Kosovës.
Smith paraqitet i veshur me togën e gjyqtarit, me çekiç në dorë ku shkruan “BE”, në protestën që po mbahet në Prishtinë për të kundërshtuar këtë dënim.
Në plan të parë shihen dy protestues ndërsa në pankartë a anash tij shfaqet silueta e Albin Kurtit, kryeministrit të Kosovës.
Qytetarë të shumtë po protestojnë çdo natë në Prishtinë, që prej 16 shtatorit, kur Hashim Thaçi, Kadri Veseli, Rexhep Selimi dhe Jakup Krasniqi u dënuan me gjithsej 81 vjet burgim.
Jashtë gjykatës në Hagë dhe në sheshin kryesor të Prishtinës, ku ishin mbledhur qindra njerëz për ta pritur vendimin, ata mbetën heronj luftës së përgjkshme për pavarësinë e vendit.
Shfuqizimi ose ndryshimi i ligjit për Gjykatën Speciale, është njëra nga kërkesat e protestave të vazhdueshme.
Organizatori i protestave “Jo në emrin tim”, Çlirim Haziri, në protestën masive të sotme në Prishtinë, ka kërkuar drejtësi të bazuar në prova dhe veprime konkrete institucionale për mbrojtjen e UÇK-së. Në fjalimin e tij, Haziri iu drejtua veçanërisht rinisë, ndërsa kujtoi babain e tij, Xhavit Hazirin, i cili mungon që nga viti 1998 dhe për fatin e të cilit familja ende pret përgjigje.
“Rini e Kosovës, hallall ju qoftë gjaku i babës tem! Hallall ju qoftë! Sepse kur ju shoh të lirë, në këmbë, duke mos harruar prej nga erdhi kjo liri, e kuptoj se sakrifica e tyre jeton te ju”, tha Haziri.
Ai theksoi se data e protestës, 1 tetori, ishte zgjedhur për të kujtuar qëndresën e studentëve që, 29 vjet më parë, dolën në rrugë për universitetin, dinjitetin dhe lirinë.
“Sepse mund ta ndalësh një marsh, por nuk mund ta ndalësh një popull kur vendos të ngrihet! 29 vjet më vonë, ne jemi përsëri në këto rrugë. Në një Kosovë tjetër. Në një Kosovë të lirë. Për një arsye tjetër. Por me një përgjegjësi që nuk ka ndryshuar: të mos heshtim!”, u shpreh ai.
Duke iu drejtuar brezit të pasluftës, Haziri tha se liria që gëzon sot rinia lidhet me sakrificën e familjeve të saj.
“Ju nuk e keni parë luftën me sytë tuaj, por jeni rritur me lirinë që doli prej saj. Në shumë prej shtëpive tuaja, historia nuk është fotografi në libër. Është fotografi në mur!”, tha ai.
Një pjesë të fjalimit, Haziri ia kushtoi mungesës së babait dhe dhimbjes së familjeve që ende presin të mësojnë fatin e më të dashurve të tyre.
“Për shumë prej jush, Xhavit Haziri është Hero i Kombit. Për mua, është babai im. Babai që mungon që nga viti 1998. Babai të cilit ende nuk ia di varrin ku mund t’ia vendos një lule”, deklaroi ai.
“Kur e dëgjoj fjalën UÇK, shoh babain tim. Shoh shokët e tij. Shoh nënat që pritën. Shoh fëmijët që u rritën pa baballarë. Shoh varret e dëshmorëve. Shoh gjyshen time Fahrijen që ende pret një lajm për djalin e saj. Dhe shoh edhe varret që ende mungojnë”, shtoi Haziri.
Duke folur për procesin në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit, ai kundërshtoi mënyrën se si, sipas tij, po trajtohet përgjegjësia e udhëheqësve të UÇK-së. Haziri theksoi se protesta nuk synon të mbulojë krimet individuale.
“Ne nuk jemi në këtë shesh për t’ia mbuluar krimet individuale askujt! Kush ka bërë krim, le të përgjigjet! Por nuk lejojmë askënd që t’i fshehë krimet e vërteta të të tjerëve, duke ua hedhur barrën në supe udhëheqësve të UÇK-së!”, tha ai.
Haziri kërkoi që drejtësia të mbështetet në prova, ligj dhe standarde të barabarta, ndërsa përsëriti kërkesën për miratimin e ligjit.
“Ne jemi këtu për drejtësi të drejtë! Për drejtësi që bazohet në prova, në ligj dhe në standarde të barabarta — jo në politikë! Për ta bërë atë ligj realitet! Për ta mbrojtur UÇK-në me shtet e me vepra, jo me fjalë!”, deklaroi ai.
“Marshi ynë nuk është ikje nga drejtësia, por mburojë e të vërtetës nga gënjeshtrat!”, shtoi Haziri.
Ai tha se historia e luftës dhe e sakrificës për liri u përket të gjithë qytetarëve të Kosovës.
“Kjo është historia jonë! Nuk është historia e një krahine. Nuk është historia e një partie. Është historia e një populli të tërë!”, u shpreh ai.
Duke folur edhe si baba i dy fëmijëve, Epirit dhe Krenës, Haziri ngriti pyetjen se çfarë përgjigjeje do t’i japë brezit të ardhshëm për angazhimin e tij sot.
“Çka t’ju them kur një ditë të rriten, të më dalin përballë, të më shikojnë në sy dhe të më pyesin: ‘Çka bëre ti, babë, kur u prek gjaku i dëshmorëve? Çka bëre ti, babë, kur njerëzit e UÇK-së u dënuan në Hagë? Ku ishe ti, babë?’”, tha ai.
Sipas Hazirit, qëllimi i protestës është arritja e rezultateve konkrete.
“Qëllimi ynë nuk është t’ia bëjmë një alibi vetes! […] Babai juaj nuk doli në shesh vetëm për të protestuar. Babai juaj, bashkë me popullin e Kosovës, dolën, marshuan dhe fituan!”, u shpreh ai, duke treguar përgjigjen që dëshiron t’u japë fëmijëve të tij në të ardhmen.
Në përfundim, Haziri iu drejtua simbolikisht babait të tij, duke e mbyllur fjalimin me mesazhin:
“Babë, gjithë jetën jam rritur me mungesën tënde. […] Sot jam bërë vetë baba. Dhe sot e di sa e rëndë duhet të ketë qenë të lësh fëmijën tënd pas, për një liri që nuk e dije nëse do ta jetoje ndonjëherë. E nuk e jetove kurrë. Prandaj sot, para gjithë këtyre njerëzve, kam vetëm një gjë për të të thënë: Babë, më mirë pa ty, se pa atdhe!”
“Lavdi dëshmorëve të kombit! Lavdi Ushtrisë Çlirimtare të Kosovës! Kosova nuk harron! Jo në emrin tim!”, përfundoi Haziri.
Ish-nënkryetari i Organizatës së Veteranëve të Luftës së UÇK-së, Nasim Haradinaj, ka bërë thirrje për bashkim të deputetëve të Kuvendit të Kosovës, ndërsa kritikoi ndërkombëtarët për mënyrën se si, sipas tij, janë trajtuar rastet që lidhen me luftën e UÇK-së.
Haradinaj ka mbajtur fjalim para protestuesve në sheshin e Prishtinës, ku kërkoi drejtësi dhe zbardhjen e krimeve të kryera gjatë luftës.
Duke iu drejtuar deputetëve të Kuvendit të Kosovës, ai kërkoi nga ta që të bashkohen dhe të marrin përgjegjësi.
“Ju 100 deputetët që jeni atje, të 100-tit, secili me përgjegjësinë e vet dhe me peshën që ka kërkuar vetë me u ngarku, qoftë të votës, qoftë të premtimeve, ju thërrasim për bashkim! Bashkim! Bashkim!”, tha Haradinaj.
Ai pati mesazh edhe për komunitetin ndërkombëtar, duke thënë se besimi ndaj tyre ishte ndërtuar mbi mbështetjen që, sipas tij, i ishte dhënë luftës së UÇK-së.
“Ndërkombëtarët, që ju besuam sepse i patëm bindur të na ndihmojnë në luftën e UÇK-së dhe bashkë të fitojmë. Ata u ndanë pa viktima sepse ne na kishin këtu. Ata morën mburrjen, ne morëm lirinë. Por tani ju themi: Na keni tradhtuar dhe na ktheni besimin!”, deklaroi ai.
Haradinaj tha se kërkesa e protestuesve është për drejtësi dhe zbulimin e krimeve, duke kundërshtuar atë që e cilësoi si keqpërdorim të rasteve.
“Ne kërkojmë vetëm drejtësi! Drejtësi dhe zbulim të krimeve patjetër, sepse shumë herë po mundohen ta keqpërdorin. Kosova ka ngritur institucione, ka njerëz profesionalisht që drejtësinë ta çojnë në vend”, u shpreh Haradinaj.
Ai kritikoi gjithashtu trajtimin e rasteve që lidhen me viktimat e luftës, duke thënë se nuk pranon që masakrat dhe viktimat civile të trajtohen si raste individuale.
“Ndërkombëtarë nuk mund të mashtroni se janë raste individuale. Nuk pranojmë të ofendohen 400 të ekzekutuarit në masakra, nuk pranojmë të ofendohen fëmijët tanë, nuk pranojmë të ofendohet gjaku ynë!”, tha Haradinaj.
Në fund të fjalimit, ai bëri thirrje për unitet rreth UÇK-së dhe iu drejtua ish-pjesëtarëve të UÇK-së që ndodhen në Hagë.
“Rroftë UÇK-ja! Nga sot e tutje, të gjithë UÇK! Lavdi dhe shokëve atje në Hagë ju përshëndes! Nasimi, që ju jeni në Hagë e këta këtu, ose do t’ju sjellim juve këtu, ose do të vijmë atje! Rroftë UÇK-ja”, përfundoi Haradinaj.
Gazetari Muhamet Mavraj, njëri prej organizatorëve të lëvizjes studentore që kishte organizuar demostratat ikonike të 1 tetorit të vitit 1997, doli sot para qytetarëve të mbledhur në sheshet e Prishtinës në protestën kundër aktgjykimit dënues të Gjykatës Speciale ndaj ish-krerëve të Ushtrisë Çlirimtare të Kosovës.
Mavraj tha se “pa arsimin shqiptar dhe pa Ushtrinë Çlirimtare të Kosovës kurrë s’do të bëheshim shtet”.
“Më 1 nëntor 1997, i tërë kombi, të gjitha rrymat, të majtë e të djathtë, dashamirë e jo dashamirë, mësues, arsimtarë, profesorë e dekanë, mbarë popullin e bëmë bashkë sepse dolëm mbi dallimet tona. Dhe ishin shumë, e jo pak. Po kështu, sa herë që kombi është në rrezik, do të dalim përmbi fe e përmbi parti, sepse më të parën parti e kemi Shqiptarinë dhe më të parën fe e kemi Shqiptarinë”, tha ai.
Mavraj tha se një milion shqiptarë ishin “në këmbë atë ditë”.
Qytetarë të shumtë po protestojnë çdo natë në Prishtinë, që prej 16 shtatorit, kur Hashim Thaçi, Kadri Veseli, Rexhep Selimi dhe Jakup Krasniqi u dënuan me gjithsej 81 vjet burgim.
Jashtë gjykatës në Hagë dhe në sheshin kryesor të Prishtinës, ku ishin mbledhur qindra njerëz për ta pritur vendimin atë ditë, ata mbetën heronj luftës së përgjkshme për pavarësinë e vendit.
Shfuqizimi ose ndryshimi i ligjit për Gjykatën Speciale, është njëra nga kërkesat e protestave të vazhdueshme.
Sot, në sheshin “Skënderbeu” në Prishtinë po zhvillohet një protestë e madhe në mbështetje të ish-krerëve të Ushtrisë Çlirimtare të Kosovës.
Gjatë protestës është shënuar edhe një moment i veçantë dhe simbolik.
Disa nga protestuesit kanë lëshuar pëllumba të bardhë në qiell, duke krijuar një pamje që tërhoqi vëmendjen e të pranishmëve./Klankosova
Këngëtari Ilir Shaqiri ka publikuar një tekst të ri me titullin “Jo në emrin tim”, kushtuar luftës, çlirimtarëve dhe Kosovës.
Në vargjet e publikuara, Shaqiri shpreh përkrahjen e tij ndaj UÇK’së, dhe luftetarëve.
“Me gënjeshtra e sajime e njollosin luftën time”, shkruan ndër të tjera Shaqiri në postimin e tij.
Postimi:
JO NË EMRIN TIM
Me të drejtë pyes botën sytë ku i ka?
I shpërblen armiqtë që na kanë vra
Me gënjeshtra e sajime
E njollosin luftën time
Vështirë e kanë mes ballit me na pa,
Këto tri shkronja tona t’shenjta
Nëpër breza rrojnë te zemra
Gjersa dielli tokës ka me i ra.
S’ka liri
S’ka as ditë të mbarë
Pa u kthy n’atdhe
Trimat çlirimtarë.
Padrejtësi
E gjyqe pambarim
Kosova po thërret
Jo në emrin tim.
Ditë-përditë na e shkelin n’fyt lirinë
Për shtatë faje që kurrë si kem ba.
Me gënjeshtra e sajime
E njollosin luftën time
Vështirë e kanë mes ballit me na pa.
Këto tri shkronja tona t’shenjta
Nëpër breza rrojnë te zemra
Gjersa dielli tokës ka me i ra…
S’ka liri
S’ka as ditë të mbarë
Pa u kthy n’atdhe
Trimat çlirimtarë.
Padrejtësi
E gjyqe pambarim
Kosova po thërret
Jo në emrin tim.
ISh
Në protestën “Jo në emrin tim”, që po mbahet sot në sheshin “Skënderbeu” në Prishtinë, po marrin pjesë edhe familjarë të ish-krerëve të Ushtrisë Çlirimtare të Kosovës.
Në mesin e të pranishmëve janë parë familjarë të Hashim Thaçit, Kadri Veselit, Jakup Krasniqit dhe Rexhep Selimit, të cilët janë dënuar nga Dhomat e Specializuara të Kosovës në Hagë.
Protesta, e organizuar nga platforma “Liria Ka Emër”, ka nisur në orën 16:00 dhe zhvillohet nën moton “Jo në emrin tim”, në kundërshtim me aktgjykimin e Dhomave të Specializuara ndaj Hashim Thaçit, Kadri Veselit, Jakup Krasniqit dhe Rexhep Selimit.
Gazmend Syla nga OVL e UÇK-së, ka folur në protestën e sotme që po zhvillohet kundër dënimit të ish-krerëve të UÇK’së.
Syla, është solidarizuar me ish-krerët e UÇK’së duke thënë se nga 16 shtatori edhe luftëtarët e tjerë të UÇK’së janë ‘’anëtarë të NPK’së’’.
‘‘Harrove edhe një epitet Berat, na jemi anëtarë edhe të Ndërmarrjes së Përbashkët Kriminale prej 16 shtatorit, prej një Gjykate që nuk din ça ka ndodh në vitet 98/99 këtu, turpi i mbuloftë kudo që janë ata’’, ka thënë ai mes tjerash, përcjell Gazeta Express.
‘’Dënimi i 4 krerëve të UÇK’së nga Gjykata Speciale, e cila është e gjithkujt përpos e Kosovës, është vetëm vula e turpit të drejtësisë ndërkombëtare. Dënimi i Thaçit, Veselit, Krasniqit, Selimit, Mustafës e Shalës, e çon numri e viteve me të cilat është dënuar lufta jonë në 627 vjet burg’’, ka shtuar ai.
Përfaqësuesi i platformës “Liria Ka Emër”, Ismail Tasholli, ka mbajtur fjalim para protestuesve të mbledhur në mbështetje të ish-krerëve të Ushtrisë Çlirimtare të Kosovës.
Tasholli tha se qytetarët janë mbledhur për të përcjellë një mesazh të rëndësishëm, sepse siç u shpreh ajo, liria nuk ka parti politike.
“Jemi mbledhur këtu me një sebep të madh, jemi mbledhur këtu për UÇK-në. Jemi bërë bashkë për të çuar një mesazh shumë të rëndësishëm”.
“Nuk jemi bërë bashkë për shkak të partive politike, sot jemi bërë bashkë për ju, sepse varri i dëshmorit nuk ka parti politike dhe liria nuk ka parti politike”, tha Tasholli.
Deputetja e Partisë Demokratike të Kosovës, Vlora Çitaku i është bashkuar qytetarëve në protestën e organizuar nga “Liria Ka Emër” në kundërshtim të aktgjykimit të Gjykatës Speciale në Hagë ndaj ish-krerëve të UÇK-së.
Çitaku tha se kjo betejë është beteja më e rëndësishme për Kosovën dhe shqiptarët.
“Është beteja më e rëndësishme për Kosovën, për shqiptarët dhe historinë”, tha ajo.
Protesta kundër Gjykatës Speciale ka nisur.
Shqiptarët kanë mbushur sheshin ‘Skënderbeu’ në Prishtinë në mbrojtje të çlirimtarëve.
Protesta është thirru r nga “Liria Ka Emër” në kundërshtim të aktgjykimit të Gjykatës Speciale në Hagë ndaj ish-krerëve të UÇK-së.
Qytetarë të shumtë janë grumbulluar në sheshin “Skënderbeu” për protestën e sotme në mbështetje të ish-krerëve të UÇK’së, Hashim Thaçi, Kadri Veseli, Jakup Krasniqi e Rexhep Selimi, ndaj të cilëve u shpall aktgjykim dënues në shkallë të parë nga Dhomat e Specializuara.
Platforma “Liria ka Emër” ka publikuar pamje krahas thirrjes ndaj qytetarëve për t’iu bashkuar kësaj proteste.
Presidentja e Komisionit Evropian, Ursula von der Leyen, u pyet për Projektligjin e propozuar nga PDK’ja për plotësim-ndryshimin e Ligjit për Dhomat e Specializuara.
Von der Leyen tha se kjo është çështje e Kosovës, por pavarësia e gjyqësorit është kusht.
“I përket Kosovës që të vendosë. Është me rëndësi që të garantohet pavarësia e gjyqësorit. Në këtë kuadër i përket Kosovës që të vendosë se çfarë është e nevojshme të bëhet ose jo, por është me rëndësi që gjyqësori të mbahet i pavarur”.
Von der Leyen paraprakisht tha se asgjë dhe askush nuk mund ta rishkruajë historinë e Kosovës.
“1999-a është skalitur në memorien tuaj kolektive, represioni i dhunshëm, kriza humanitare, vuajtja që e ka pësuar populli juaj. Bashkimi Europian ka qëndruar me ju që nga ajo kohë”, tha ajo.
U.D. Presidentja e Kosovës, Albulena Haxhiu, ka pritur të enjten në takim Presidenten e Komisionit Evropian, Ursula von der Leyen, me të cilën ka diskutuar për zhvillimet politike në vend, procesin e integrimit evropian dhe aktgjykimin e Dhomave të Specializuara në Hagë.
Sipas njoftimit të Presidencës, gjatë takimit është diskutuar edhe për nevojën e zgjedhjes së Presidentit të Kosovës brenda afatit kushtetues.
Haxhiu ka shprehur shqetësimin e saj dhe, siç thuhet në njoftim, të qytetarëve të Kosovës lidhur me aktgjykimin e fundit të Dhomave të Specializuara në Hagë ndaj ish-krerëve të Ushtrisë Çlirimtare të Kosovës.
“Nënvizova se institucionet e Kosovës do të vazhdojnë t’i mbështesin ekipet mbrojtëse të Hashim Thaçit, Kadri Veselit, Rexhep Selimit dhe Jakup Krasniqit në procesin e apelit. Në këtë drejtim, do të angazhohemi për hartimin e një strategjie të përbashkët shtetërore, duke i bashkërenduar veprimet me ekipet mbrojtëse dhe ekspertët, në mënyrë që mbështetja jonë t’u shërbejë sa më mirë atyre në këtë proces”, ka thënë Haxhiu.
Në takim, ajo ka kërkuar gjithashtu që Bashkimi Evropian ta shqyrtojë aplikimin e Kosovës për anëtarësim, të dorëzuar më 14 dhjetor 2022, ndërsa ka kërkuar angazhimin e drejtpërdrejtë të von der Leyen në këtë proces.
Haxhiu dhe von der Leyen kanë diskutuar edhe për zbatimin e Planit të Rritjes dhe agjendën e reformave.
“Bisedova edhe për zbatimin e Planit të Rritjes dhe reformat që na presin. Kosova ka dorëzuar Agjendën e Reformave, ka ratifikuar marrëveshjet përkatëse dhe ka filluar të përfitojë nga parafinancimi”, ka deklaruar Haxhiu.
Presidentja e Komisionit Evropian, Ursula von der Leyen tha se “Kosova po kalon në një moment të rëndësishëm politik”, në fillim të fjalës së saj pas takimit me kryeministrin Albin Kurti.
Von der Leyen e nisi me aktgjykimin e Gjykatës Speciale në Hagë, e cila i dënoi në shkallë të parë katër ish-krerër e UÇK-së.
“Do e filloja me çështjen që e përmendët edhe ju në fund të fjalës suaj, e kjo është kuptueshëm, në qendër të vëmendjes publike”, tha ajo.
“Asgjë dhe askush nuk mund ta rishkruajë historinë e Kosovës. 1999-a është skalitur në memorien tuaj kolektive, represioni i dhunshëm, kriza humanitare, vuajtja që e ka pësuar populli juaj. Bashkimi Evropian ka qëndruar me ju që nga ajo kohë”, tha Von der Leyen.
Presidentja e KE-së tha se BE-ja ka ndihmuar Kosovën, “e ardhmja e së cilës është në BE”.
Von der Leyen kujtoi se dënimi “ka shkaktuar emocione të fuqishme”, dhe iu kthye Kurtit: “Unë e çmoj reagimin tuaj të matur dhe të liderëve politikë që thërrasin për qetësi”.
Ajo tha se mandati i Gjykatës Speciale “duhet të respektohet”.
Von der Leyen tha se aktgjykimi duhet të respektohet.
“Një gjë është e qartë: ky aktgjykim ka të bëjë me përgjegjësinë individuale të personave të pandehur. Rezistenca e Kosovës nuk ka qenë në gjykim”, tha ajo.
29 vjet më parë, ishte një nga udhëheqësit e protestave studentore të 1 Tetorit 1997, për të kundërshtuar pushtimin e Kosovës nga Serbia dhe kthimin e studentëve në objektet universitare, ndërsa sot, Muhamet Mavraj, do të jetë përballë protestuesve për të kundërshtuar vendimin dënues të Dhomave të Specialuzuara të Koosvës në Hagë, ndaj ish-krerëve të Ushtrisë Çlirimtare të Kosovës.
Mavraj në një intervistë për Radio Dukagjinin thotë se mobilizimi qytetar sot do të jetë edhe më i madh edhe për shkak të përvjetorit të protestave studentore të vitit 1997.
“Nuk është vetëm për kundërshtimin e aktgjykimit, por edhe për madhërinë e vlerave e luftës së Ushtrisë Çlirimtare të Kosovës. Protesta e vitit 1997 na kujton përpjekjen e gjatë të lodhshme, të stërmundimshme, për të arritur në një pikë, në pikën ku gjithë shqiptarët, pavarësisht dallimeve më 1 tetor 1997 i bëmë bashkë dhe ishin bashkë”, shprehet Mavraj.
Sipas tij, nëse ajo frymë e unitetit është e pranishme sot, nesër e ditë në vijim, Kosova do të dalë fituese në këtë betejë të madhe ligjore.
“Unë jam shumë i bindur se presioni konstruktiv, vendosmëria, këmbëngulësia edhe kështu në mënyrë paqësore, do të ketë sukses në kohën e duhur dhe vendin e duhur.”, thekson ai.
Mavraj thotë se nga ky vendim dënues për ish-krerët e UÇK-së, janë prekur gjithë shqiptarët anembanë botës.
“Sot kur i shoh fëmijët e Kosovës që përfundojnë detyrat e shtëpisë, dhe me flamujt kombëtar dhe të UCK-së dhe shkojnë në protestë pa folur shumë, kjo sado që më prek, më jep shumë shpresë se nuk do të shkojë kot mundi i dëshmorëve të lirisë”, thotë Mavraj.
Protesta gjithëpopullore është thirrur për në orën 16;00 në sheshin “Skënderbeu”, në Prishtinë, për të kundërshtuar vendimin e Gjykatës Speciale për katërshen e Ushtrisë Çlirimtare të Kosovës.
Komuna e Prishtinës ka njoftuar se sot, nga ora 14:00, disa linja të transportit publik do të qarkullojnë në rrugë alternative, për shkak të mbylljes së rrugës “Luan Haradinaj”.
Linjat 4, 3B dhe 10 do të devijohen nëpër rrugën “Agim Ramadani”, ndërsa linja 6 do të vazhdojë qarkullimin përmes rrugëve “UÇK”, “Tirana”, “Garibaldi” dhe “Ukshin Hoti”.
Komuna ka bërë të ditur se ndryshimet do të jenë të përkohshme dhe do të vlejnë deri në njoftimin e radhës.
Për shkak të marshit dhe ndryshimeve në qarkullim, mund të ketë edhe vonesa në transportin publik.
Senati i Universitetit të Prishtinës ka miratuar një deklaratë lidhur me luftën çlirimtare të Kosovës dhe zhvillimet pas aktgjykimit të Dhomave të Specializuara në Hagë ndaj ish-krerëve të UÇK-së.
Në deklaratë, Universiteti i Prishtinës thekson se drejtësia duhet të jetë e pavarur, e paanshme dhe objektive, si dhe të mbështetet në prova.
Universiteti shprehet gjithashtu se drejtësia e qëndrueshme nuk mund të ndërtohet mbi paragjykime kolektive, ndërsa vlerëson se historia e luftës së Kosovës duhet të trajtohet duke marrë parasysh rrethanat politike, shoqërore dhe humanitare në të cilat ajo është zhvilluar.
“Në të njëjtën kohë, universiteti vlerëson se historia e luftës së Kosovës nuk mund të shkëputet nga konteksti politik, shoqëror dhe humanitar, në të cilin ajo u zhvillua. Lufta e Ushtrisë Çlirimtare të Kosovës ishte pjesë e përpjekjes së popullit të Kosovës për mbrojtjen e shtëpisë, jetës, dinjitetit njerëzor, lirisë individuale dhe kolektive, si dhe të së drejtës për të jetuar i lirë nga represioni dhe dhuna”, thuhet në deklaratë.
Në dokument përmendet edhe konteksti i dhunës gjatë luftës në Kosovë, përfshirë dëbimet masive të popullsisë shqiptare dhe shkeljet e të drejtave të njeriut dhe të së drejtës humanitare.
“Kjo luftë u zhvillua në një kontekst të dhunës sistematike, dëbimeve masive dhe dëbimit të popullsisë shqiptare të Kosovës, të shoqëruara me shkelje të rënda dhe sistematike të të drejtave të njeriut dhe të së drejtës humanitare. Këto zhvillime përbëjnë pjesë të dokumentuara të historisë së Kosovës dhe të kontekstit, në të cilin duhet të kuptohet lufta e saj për liri”, thuhet më tej.
Senati i UP-së ka theksuar se trajtimi i kësaj periudhe duhet të marrë parasysh edhe rrethanat historike dhe humanitare, ndërsa në deklaratë i referohet edhe ndërhyrjes së NATO-s.
“Mbështetja dhe ndërhyrja e NATO-s duhet të kuptohen në kontekstin e krizës humanitare, të dhunës së përhapur, të dëbimeve të popullsisë dhe të nevojës për mbrojtjen e saj”, thuhet në deklaratën e Universitetit të Prishtinës.
Organizatori i protestave të përnatshme “Jo në emrin tim”, Çlirim Haziri, ka ftuar qytetarët të bashkohen sot, më 1 tetor, nga ora 16:00, në sheshet e Prishtinës, për të kundërshtuar vendimin e Gjykatës Speciale në Hagë.
Përmes një postimi, Haziri ka bërë thirrje për bashkim në mbështetje të UÇK-së dhe të së vërtetës së luftës çlirimtare.
“Jemi bashkë për UÇK-në. Jemi bashkë për të vërtetën tonë”, ka shkruar ai.
Haziri ka njoftuar gjithashtu se pas marshit të sotëm, protestat e mbrëmjes do të vazhdojnë nga nesër.
“Sot marshojmë. Nga nesër vazhdojmë përsëri me protestën e mbrëmjes. Shihemi në ora 16:00!”, ka përfunduar ai.
Policia e Kosovës ka njoftuar se ka ndërmarrë masat e nevojshme të sigurisë për protestën e paralajmëruar sot në sheshin “Skënderbeu” në Prishtinë, e organizuar nga platforma “Liria ka emër” në shenjë pakënaqësie lidhur me aktgjykimin e Gjykatës Speciale ndaj ish-krerëve të UÇK-së.
Protesta është paralajmëruar të nisë në orën 16:00, ndërsa Policia ka bërë të ditur se zyrtarët policorë do të jenë të pranishëm në terren para, gjatë dhe pas përfundimit të saj.
“Policia e Kosovës, lidhur me protestën e paralajmëruar për sot në orën 16:00, në sheshin ‘Skënderbeu’ në Prishtinë, nga platforma ‘Liria ka emër’ për të shprehur vazhdimin e pakënaqësive lidhur me aktgjykimin e Gjykatës Speciale në Hagë ndaj ish-krerëve të UÇK-së, ka ndërmarrë masat e nevojshme policore për ofrimin e sigurisë, ruajtjen e rendit e qetësisë publike si dhe mbarëvajtjen e protestës para, gjatë dhe deri në përfundimin e saj”, thuhet në komunikatën e Policisë.
Policia ka theksuar se e njeh të drejtën e qytetarëve për protestë dhe shprehje të lirë, duke kërkuar që tubimi të zhvillohet në mënyrë paqësore dhe brenda kornizës ligjore.
“Policia e Kosovës, sipas Ligjit mbi tubimet publike, e njeh të drejtën e qytetarëve për shprehjen e lirë përmes tubimeve e protestave të qeta dhe sipas detyrës zyrtare angazhohet që mbarëvajtja e protestës të kalojë e qetë dhe pa ndonjë incident dhe që pjesëmarrësit në protestë të shprehin qëllimin e tyre në mënyrë demokratike dhe në suaza ligjore”, thuhet më tej.
Kufizime në qarkullim
Për shkak të protestës dhe lëvizjes së pjesëmarrësve, Policia ka paralajmëruar kufizime dhe ndërprerje të përkohshme të qarkullimit në disa rrugë të kryeqytetit.
Sipas planifikimeve policore, nga ora 15:00 do të mbyllen përkohësisht për qarkullim rrugët “Luan Haradinaj” dhe “Enver Zymeri”.
“Varësisht nevojës operative mund të ketë edhe rrugë të tjera në të cilat mund të ndërpritet qarkullimi përkohësisht”, ka njoftuar Policia.
Për menaxhimin e qarkullimit dhe, nëse është e nevojshme, orientimin e automjeteve drejt rrugëve alternative, në terren do të angazhohen edhe njësitë policore të trafikut.
Policia ka apeluar te qytetarët që të tregojnë kujdes të shtuar gjatë lëvizjes në kryeqytet dhe të respektojnë rregullat e trafikut.
“Policia e Kosovës, falënderon organizatorët dhe qytetarët për bashkëpunimin dhe mirëkuptimin e treguar në vazhdimësi ndaj policisë dhe njëkohësisht apelon që të kenë kujdes të shtuar, të respektojnë ligjet dhe rregullat në trafikun rrugor në interes të sigurisë së përgjithshme”, thuhet në komunikatë.
Kuvendi i Komunës së Prizrenit ka miratuar unanimisht deklaratën lidhur me aktgjykimin e 16 shtatorit ndaj ish-drejtuesve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.
Sipas njoftimit të Komunës së Prizrenit, deklarata u miratua në mbledhjen e jashtëzakonshme të Kuvendit, të mbajtur më 1 tetor 2026, në prani të anëtarëve të Kuvendit, monitoruesve dhe përfaqësuesve të mediave.
Në deklaratë, Kuvendi shpreh mospajtim të thellë me aktgjykimin e shkallës së parë të Dhomave të Specializuara të Kosovës, duke theksuar se përgjegjësia penale është individuale dhe nuk duhet të interpretohet si përgjegjësi kolektive e UÇK-së dhe luftës së saj.
Kuvendi i Prizrenit gjithashtu ka shprehur solidaritet me Thaçin, Veselin, Krasniqin dhe Selimin, si dhe me familjet e tyre.
Në deklaratë u bëhet thirrje qytetarëve që, pavarësisht dhimbjes dhe emocioneve, të ruajnë qetësinë, dinjitetin dhe unitetin, duke i shprehur qëndrimet në mënyrë paqësore dhe institucionale.
Në fund, duke iu referuar formulimit “Në emër të popullit të Kosovës” gjatë shpalljes së aktgjykimit, Kuvendi i Komunës së Prizrenit ka përcjellë mesazhin: “JO NË EMRIN TIM!”
Dhomat e Specializuara të Kosovës (DhSK) në Hagë, ia kanë vazhduar masën e paraburgimit ish-presidentit Hashim Thaçi në rastin ku bashkë me Bashkim Smakajn, Isni Kilajn, Fadil Fazliun dhe Hajredin Kuçin, ngarkohen për vepra penale kundër administrimit të drejtësisë.
Vendimi është marrë nga gjykatësi i vetëm i këtij rasti, Christopher Gosnell më 30 shtator 2026, raporton “Betimi për Drejtësi“.
Sipas vendimit, gjykatësi konstatoi se vazhdojnë të ekzistojnë rreziqet që Thaçi mund të pengojë ecurinë e procesit apo të kryejë vepra penale të tjera.
Po ashtu, për vazhdimin e paraburgimit, Specialja bën të ditur se gjykatësi mori parasysh edhe faktin që Thaçi u shpall fajtor dhe u dënua në gjykimin për krime lufte.
“Gjykatësi mori parasysh gjithashtu edhe shpalljen fajtor dhe dënimin e Thaçit në çështjen gjyqësore KSC-BC-2020-06 kohët e fundit dhe konstatoi se ato nuk e ndryshonin nevojën për rishikime periodike të paraburgimit të tij në çështjen aktuale, që në parim vlerësohet në bazë të faktorëve në lidhje me këtë çështje”, thekson Specialja.
Gjykatësi vlerësoi se caktimi i paraburgimit vazhdon të mbetet i domosdoshëm dhe proporcional.
Kujtojmë se në rastin për krime lufte, Specialja shpalli aktgjykimin më 16 shtator 2026, me të cilin Thaçi u dënua me 25 vjet burgim. Me aq vite burgim u dënua edhe Jakup Krasniqi. Ndërkaq, Kadri Veseli me 18 vjet burgim e Rexhep Selimi me 13.
Në gjykimin për veprat penale kundër administrimit të dejtësisë, më 14 shtator 2026 ka përfunduar paraqitja e fjalëve përfundimtare nga palët në procedurë.
Në seancën fillestare më 27 shkurt 2026, Hashim Thaçi, Bashkim Smakaj, Fadil Fazliu, Isni Klilaj dhe Hajredin Kuçi, u deklaruan të pafajshëm për veprat penale që iu vihen në barrë.
Po atë ditë (27 shkurt 2026), nisi dëshminë edhe dëshmitari i parë në këtë çështje gjyqësore, i cili ishte me masa mbrojtëse. Dëshmia e tij përfundoi më 2 mars 2026.
Më 3 dhe 4 mars 2026 dëshmoi dëshmitari i dytë Koen Herlaar- ekspert i kriminalistikës në Institutin e Kriminalistikës së Holandës. Po më 4 mars nisi dëshminë dëshmitari i tretë, Chrisopher Kelly- hetues i forenzikës digjitale. Ky dëshmitar e përfundoi dëshminë më 5 mars. Ndërsa, si dëshmitare e mbrojtjes së Thaçit dëshmoi ekspertja e transkriptimit në fushën e kriminalistikës, Helen Fraser. Ajo dëshmoi mç 11 dhe 12 maj 2026.
Ndryshe, Hashim Thaçi ndodhet në Qendrën e Paraburgimit në Hagë që nga nëntori i vitit 2020. Ai është duke u gjykuar për krime lufte, si dhe më 2024 i është ngritur aktakuza kundër administrimit të drejtësisë.
Lidhur me rastin kundër administrimit të drejtësisë, Bashkim Smakaj, Fadil Fazliu dhe Isni Kilaj u arrestuan më 5 dhjetor 2024 në Kosovë dhe u transferuan në objektin e paraburgimit në DhSK, më 6 dhjetor 2024 në bazë të aktakuzës së konfirmuar dhe fletarrestimeve të lëshuara nga Haga.
Ndërsa, Thaçit i është dorëzuar fletarrestimi në objektin e paraburgimit në Hagë më 5 dhjetor 2024, gjithnjë sipas njoftimit të DhSK-së.
Kurse, Hajredin Kuçit i është dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake për paraqitjen e parë, e cila u mbajt 9 dhjetor.
Sipas aktakuzës, Thaçi individualisht dhe përmes veprimeve të përbashkëta me grupet; Grupi Fazliu (Fadil Fazliu dhe Fahri Fazliu), Grupin Smakaj (Bashkim Smakaj, Blerim Shala dhe Artan Behrami) si dhe Grupin Kilaj (Isni Kilaj dhe Vllaznim Kryeziu), kanë ndjekur një model të sjelljes për të penguar personat zyrtarë në kryerjen e detyrave zyrtare.
Në aktakuzë thuhet se Thaçi ka udhëhequr dhe marrë pjesë në këto përpjekje përmes vizitave të tij në objektet e paraburgimit gjatë kohës sa ishte i paraburgosur në kuadër të gjykimit të tij për krime lufte dhe krime kundër njerëzimit.
Aty thuhet se anëtarët e Grupit Fazliu, Grupit Smakaj dhe Grupit Kilaj u koordinuan për të ndikuar në dëshmitarët e ZPS-së gjatë vizitave jo të priveligjuara të datave 2 korrik, 9 shtator dhe 6 tetor 2023.
Si rrjedhojë, ndaj Thaçit rëndojnë tri akuza për pengim të personit zyrtar në kryerjen e detyrave zyrtare, tri për shkelje të fshehtësisë së procedurës dhe katër akuza për mosbindje ndaj gjykatës.
Ndërsa, Kilaj, Smakaj dhe Fazliu akuzohen për tentativë të pengimit të personave zyrtarë në kryerjen e detyrave zyrtare dhe mosbindje ndaj gjykatës. Kurse, Kuçi i ka dy akuza për mosbindje ndaj gjykatës.
Kryetari i Komisionit për Arsim, Shkencë dhe Teknologji, Enver Hoxhaj, e ka lëshuar mbledhjen e këtij komisioni, në përputhje me vendimin e Grupit Parlamentar të PDK-së për të bojkotuar punën e komisioneve parlamentare deri në procedimin e ndryshimeve në Ligjin për Dhomat e Specializuara.
Hoxhaj, i cili drejton komisionin në emër të PDK-së, para largimit u bëri thirrje deputetëve dhe subjekteve politike që të angazhohen për ndryshimin e ligjit për Gjykatën Speciale.
Ai tha se nuk do të marrë pjesë në diskutimet për fushëveprimin e komisionit, duke ua lënë anëtarëve të tjerë vazhdimin e mbledhjes.
“Unë nuk do të propozoj asgjë për fushëveprimin e komisionit. Kam dashur të jem fer me juve dhe konkret vetëm se i takon kushtëzimit të komisionit. Unë e lëshoj këtë mbledhje. I ftoj kolegët dhe të gjitha subjektet politike që ta amandamentojnë ligjin për Gjykatën Speciale. Kolegët e tjerë çfarëdo që keni prej sugjerimeve sa i takon fushëveprimit të këtij komisioni besoj që mund t’i vazhdoni”, tha ai.
Pas largimit të Hoxhajt, mbledhjen e ka udhëhequr nënkryetarja e komisionit, Arjeta Fejza.
Ajo tha se situata aktuale politike dhe institucionale po ndikon edhe në punën e komisionit, duke theksuar se për çështjen e Ligjit për Dhomat e Specializuara tashmë ka diskutime ndërmjet subjekteve politike, si dhe qëndrime të Qeverisë.
“Sa i përket çështjes së ligjit, tashmë ka një diskutim i cili është duke u bërë nga subjektet politike, ka një qëndrim edhe të ministrisë dhe të kryeministrit në këtë proces. Në anën tjetër, ne si komision, siç u përmend edhe nga parafolësit, kemi çështje të cilat konkretisht e afektojnë mënyrën se si do të funksionojë arsimi në dritë të tij. Andaj pajtohem që ne nuk jemi në rrethana normale për të funksionuar. Uroj që sa më shpejt të konsolidohen të gjitha institucionet e Republikës së Kosovës, edhe ne vërtet mund të vazhdojmë me punën tonë edhe si komision edhe si kuvend, më konkretisht si komision për arsim për të trajtuar të gjitha çështjet që bien mbi fushëveprimtarinë tonë”, tha Fejza.
Pavarësisht largimit të Hoxhajt, mbledhja vazhdoi me anëtarët e tjerë të komisionit.
Ata votuan unanimisht për konstituimin e Komisionit për Arsim, Shkencë dhe Teknologji, si dhe për fushëveprimin e tij.
Deputetët e Partisë Demokratike të Kosovës janë larguar nga mbledhja e Komisionit për Mbikëqyrjen e Agjencisë së Kosovës për Inteligjencë (AKI), menjëherë pas konstituimit të tij.
Ata kanë bërë të ditur se vendimi për t’u larguar lidhet me kërkesën e PDK-së që në Kuvend të procedohet sa më shpejt plotësim-ndryshimi i Ligjit për Dhomat e Specializuara të Kosovës.
Deputetja Besa Kabashi-Ramaj tha se PDK-ja e konsideron funksionalizimin e komisioneve parlamentare të rëndësishëm, por sipas saj, në rrethanat aktuale çështja e Dhomave të Specializuara duhet të trajtohet me prioritet.
“Konstituimi i institucioneve është shumë i rëndësishëm dhe prandaj edhe ishim pjesë e këtij komisioni. Mirëpo, pas konstituimit u larguam, sepse për momentin nuk ka prioritet më të madh për Republikën e Kosovës sesa procedimi i plotësim-ndryshimit të Ligjit për Specialen”, tha ajo.
Në të njëjtën linjë u shpreh edhe deputeti Rrahman Rama. Ai deklaroi se PDK-ja nuk do të marrë pjesë në mbledhjet e komisioneve të tjera parlamentare deri në procedimin e këtij ligji.
“Për ne është prioritet mbi prioritetet. Nuk do të marrim pjesë në asnjë komision pa u kryer ky ligj”, deklaroi Rama.
Ai tha se PDK-ja pret që Qeveria ta përmbushë zotimin për ta proceduar projektligjin brenda kësaj jave, duke theksuar se partia kërkon që procedurat të nisin sa më shpejt.
Rama foli edhe për takimet e paralajmëruara ndërmjet kryeministrit Albin Kurti dhe kryetarit të PDK-së, Bedri Hamza, për çështjen e zgjedhjes së presidentit.
Sipas tij, para diskutimeve për këtë çështje, PDK-ja kërkon që të trajtohet Ligji për Dhomat e Specializuara, përfshirë mbikëqyrjen e procesit dhe sigurimin e përkrahjes financiare.
“Për ne prioritet është që Ligji për Dhomat e Specializuara të ketë mbikëqyrje të procesit dhe përkrahje financiare. Pas kësaj mund të ulemi dhe të diskutojmë edhe për çështjet e tjera, përfshirë funksionalizimin sa më të shpejtë të institucioneve”, tha Rama./eo/
Reporteri.net është gazetë online e lajmeve nga vendi dhe bota. Qëllim kryesor ka informimin e drejtë, të paanshëm dhe të shpejtë. Reporteri.net, në pronësi të “R Media L.L.C.”, është themeluar në mars të vitit 2019 dhe drejtohet nga gazetarët Bekim Kabashi dhe Mentor Gjergjaj.
E-Mail: info@reporteri.net
Marketing: marketing@reporteri.net
Adresa: Rr. UÇK, Nr. 102/11 10000 Prishtinë, Kosovë
