Katër muaj që nga vendosja e taksës 100 për qind për produktet e importuara nga Serbia dhe Bosnje e Hercegovina, kapacitetet prodhuese vendore kanë shënuar rritje dhe rrjedhimisht ka pasur ndikim edhe në hapjen e vendeve të reja të punës, thonë përfaqësues të kompanive prodhuese dhe zyrtarë të Qeverisë së Kosovës.
Për dallim nga disa biznese tregtare por edhe ato që lëndën e parë e kanë siguruar në Serbi, prodhuesit që nuk varen nga tregu serb, besojnë se kanë përfituar nga taksa, shkruan REL.
Vendimi i Qeverisë së Kosovës për taksën doganore, fillimisht 10 për qind e më pas 100 për qind, është në fuqi që nga muaji nëntor i vitit të kaluar.
Sidoqoftë, kjo taksë po konsiderohet si një pengesë politike, pasi ka shkaktuar bllokim të dialogut.
Ndryshe, Amerika dhe vendet e tjera perëndimore që janë miq të Kosovës, kanë kërkuar që taksa ndaj Serbisë dhe Bosnjës të pezullohet dhe të ketë fokus në dialog.