Mos nënshkrimi i marrëveshjes së Rambujesë nga Serbia, kishte detyruar NATO-n që të fillojë bombardimet ndaj Serbisë, për të ndalë gjenocidin dhe spastrimin etnik në Kosovë.

Ndërkohë Sllobodan Millosheviq kishte tentuar që në çfarëdo forme të parandalonte sulmet, duke i bërë kështu edhe oferta NATO-së.

Në një intervistë për tanjug, një nga njerëzit më të afërt të presidentit famëkeq serb, Momir Bullatoviq, ka treguar se çfarë i kishte ofruar Millosheviq si ofertë Perëndimit për të mos e bombarduar Serbinë.

Sipas tij, Serbia kishte ofruar koncesione në miniera ndërsa përfaqësuesit ndërkombëtarë të rreshtuar në aleancën ushtarake perëndimore kishin thënë se kjo ishte ofertë interesante porse, megjithatë, nuk e donin.

“Oferta e dytë ka qenë, nëse u duhet bazë ushtarake, ne do t’ua japim me një kompensim simbolik, por ata për këtë thanë, jo faleminderit”, ka thënë Bullatoviq.

Ai ka treguar se Millosheviq kur e kishte parë që nuk po pranojnë asnjë ofertë, kishte provuar që t’i bindte duke iu thënë që Serbia të bëhet anëtare e NATO-së, por edhe një gjë e tillë ishte refuzuar.

Madje ishin qeshur me oferta të tilla të tij.

“Krejt në fund, shumë të dëshpëruar, për t’iu shpëtuar bombardimeve, u thamë se është mirë që Serbia të jetë anëtare e NATO-s”, shtoi ai.

“Ata u qeshën, thanë të jetë interesante edhe kjo, por as kjo nuk bën”, ka treguar Bullatoviq.