Është arritur marrëveshja për targat në takimin e sotëm në Bruksel, mes Kryenegociatorit të Kosovës, Besnik Bislimit dhe atij të Serbisë, Petar Petkoviq, shkruan Gazeta Online Reporteri.net.

Lajmin e ka bërë të ditur Shefi i Diplomacisë së BE’së, Josep Borrell, përmes një postimi në Twitter.

Borrell ka deklaruar se Kosova dhe Serbia kanë arritur marrëveshje për masat që ndihmojnë në shmangie të tensioneve dhe për koncentrim të plotë në propozimin për normalizim të marrëdhënieve mes dy vendeve.

“Arritëm marrëveshje! Shumë i kënaqur të deklaroj se kryenegociatorët e Kosovës dhe Serbisë, me ndërmjetësim të BE’së, janë pajtuar për masat që shmangin përshkallëzimin e mëtejshëm dhe të përqendrohen plotësisht në propozimin për normalizimin e marrëdhënieve, ka shkruar Borrell.

Borrell ka thënë se Serbia do të ndalojë së lëshuari targa me ëmërtimet e qyteteve të Kosovës, e Kosova do të ndërpresë veprimet e mëtejshme në lidhje me riregjistrimin e automjeteve, që i bie mos shqiptimi i gjobave, shkruan Gazeta Online Reporteri.net.

Për hapat e ardhshëm, ka thënë se do t’i ftoj palët në takim gjatë ditëve në vijim.

“Serbia do të ndalojë së lëshuari targa me emërtimet e qyteteve të Kosovës ndërsa Kosova do të ndërpresë veprimet e mëtejshme në lidhje me riregjistrimin e automjeteve. Në ditët në vijim, do t’i ftoj të dy palët për t’i diskutuar hapat e ardhshëm. E falënderoj Miroslav Lajçak dhe palët për punën e palodhshme”, ka shkruar Borrell.

We have a deal!

Very pleased to announce that Chief Negotiators of #Kosovo & #Serbia under EU-facilitation have agreed on measures to avoid further escalation and to fully concentrate on the proposal on normalisation of their relations.

— Josep Borrell Fontelles (@JosepBorrellF) November 23, 2022