Veseli nga Krusha, kërkon drejtësi për viktimat e masakrave serbe

Kryetari i Kuvendit të Kosovës ka qenë sonte në Krushë në nderim të 20 vjetorit vrasjeve të shumë qytetarëve shqiptarë të vrarë nga forcat serbe gjatë luftës, të cilët vazhdojnë të jenë të zhdukur nga shteti serb.


Kryeparlamentari Veseli ka kërkuar ndëshkimin e kriminelëve serbë që edhe pas 20 viteve nuk kanë marrë dënimin e merituar nga drejtësia ndërkombëtare për krimet dhe masakrat e kryera në Kosovë, shkruan Reporteri.net

Përmes një postimi në Facebook, Veseli ka thënë se çdo gjë tjetër pos ndëshkimit është dështim i drejtësisë ndërkombëtare.

“Në ditën e të pagjeturve sonte qëndrova në Krushë, në këtë fshat martir të Kosovës. Për pak javë ne kremtojmë 20 vjetorin e çlirimit, por plagët e luftës ende janë të gjalla në zemrat dhe mendjet tona. Ekzekutuesit e këtyre masakrave duhet të ndëshkohen. Çdo gjë tjetër pos ndëshkimit është dështim i drejtësisë ndërkombëtare. Ne kurrë nuk do të ndalemi derisa e vërteta dhe drejtësia për të pagjeturit tanë të vihen në vend”, ka shkruar Veseli.