Dy këshilltarët e kancelares Angela Merkel, Jan Hecker dhe Matias Litenberg, nga Prishtina kanë vazhduar dje për në Beograd.
Atje i priste presidenti serb, Aleksandar Vucic, me të cilin patën një takim të gjatë në orët e vona, shkruan Reporteri.net.
Siç raportojnë mediat serbe, dy këshilltarët e Merkel e mbajtën presidentin serb deri në mesnatë në një takim ku temë ishte edhe Kosova, por pas tij nuk u tha asnjë fjalë.
Ndërkaq, këshilltarët e Merkel zgjodhën të mos flasin as në Prishtinë pas përfundimit të takimit me kryeministrin Haradinaj. Ishte ky i fundit që tha disa fjalë për këtë takim, por duke mos përmendur asgjë konkrete.
Ndryshe, është thënë se takimi i Haradinajt me këshilltarët Hecker dhe Litenberg lidhej me taksën dhe dialogun, por nuk është bërë i qartë qëndrimi i Gjermanisë lidhur me temën e parë/Reporteri.net