Kryetari i Lidhjes Demokratike të Kosovës (LDK), Lumir Abdixhiku, u është përgjigjur zërave brenda partisë që, pas shpalljes së rezultateve preliminare të zgjedhjeve, kanë kërkuar përgjegjësi nga lidershipi i LDK-së.
Ai ka paralajmëruar reforma të thella të brendshme në parti, duke theksuar nevojën për riorganizim dhe forcim të strukturave pas rezultatit zgjedhor.
Sipas Abdixhikut, procesi i reformimit do të jetë i shpejtë dhe i qartë, me qëllim konsolidimin e partisë dhe forcimin e saj në skenën politike.
“Përpara nesh kemi edhe reforma të thella të brendshme. Na duhen njerëz që i japin vizionit tonë, që ndërtojnë bashkë me ne, e jo të tillë që vetëm marrin pa dhënë, pengojnë e shpresojnë në rrënim kolektiv për përfitim individual”, ka deklaruar Abdixhiku.
Ai ka theksuar se LDK duhet të vazhdojë procesin e hapjes dhe bashkimit të brendshëm, duke përfshirë energji të reja dhe duke forcuar strukturat ekzistuese në gjithë vendin.
“Bashkimi sapo ka nisur; dhe siç ju kemi thënë ky bashkim nuk do të ndalet”, ka shtuar ai, duke theksuar se partia do të vazhdojë angazhimin në terren dhe zgjerimin e bazës së saj.
Thirrje për përgjegjësi pas rezultatit mbrëmë bëri kadidati për deputet, Bekim Gashi, që është kryetar i nëndegës në Hajvali dhe i afërt me Kryetarin e Prishtinës, Përparim Ramën.
“Ka ardhur koha për reflektim. Gabimet duhen pranuar, ndërsa përgjegjësia duhet marrë”, ka shkruar Gashi.
Edhe kandidati për deputet Arben Gashi duartrokiti një deklaratë ku bëhej thirrje për ndryshim lidershipi. Përgjegjësi kërkuan edhe nga Dega e LDK-së në Prizren dhe ish-këshilltari i Avdullah Hotit, Xhavit Beqiri.
https://reporteri.net/lajme/kerset-ne-ldk-vellai-i-xhafer-tahirit-kritikon-partine-duartrokitet-nga-arben-gashi/
/Reporteri.net
