Zyra e Kryeministrit në janar të këtij viti ka blerë çizme për teren në vlerë 552 Euro. Përzgjedhja është bërë përmes procedurës së mbyllur te prokurorimit. Në njoftimin për “dhënien e kontratës” nuk tregohet sa palë çizme janë blerë me këtë çmim. Sipas Kryeministrisë, çizmet e blera kanë qenë për Komisionin për Hetimin e Aksidenteve dhe Incidenteve Aeronautike.
Tenderin në fjalë, Zyra e Kryeministrit e ka dhënë më 15 janar 2019, një ditë pasi e shpalli atë, shkruan Reporteri.net.
Për çizme, sipas Njoftimit për Nënshkrimin e Kontratës, e publikuar nga Komisioni Rregullativ i Prokurorimit Publik, Zyra e Kryeministrit Haradinaj kishte ndarë 600 Euro.
E ofertuesi më i lirë ka dalë të jetë “Melodia” sh.p.k., e cila e ka furnizuar kryeministrin dhe stafin e tij me çizme të reja për vetëm 552 Euro.
Kompania në fjalë është përzgjedhur përmes procedurës së mbyllur të prokurorimit. Me këtë rast, Zyra e Kryeministrit përveç nga fituesja e tenderit ofertë për furnizim me çizme ka kërkuar edhe nga dy kompani tjera.
Zëdhënësja e Qeverisë, Donjeta Gashi, ka thënë për Reporteri.net se çizmet janë blerë për Komisionin për Hetimin e Aksidenteve dhe Incidenteve Aeronautike.
“Është para dy muajve. Janë ble pajisje për Agjencionin KHAIA. Çizme, jelekë, e elemente tjera, për dy zyrtarë hetues të aksidenteve hekurudhorë. Nuk kanë të bëjnë me kabinetin fare”, ka thënë Gashi, duke i konsideruar “Fake News” raportimet e disa portaleve se çizmet janë blerë për nevojat e zyrës së Kryeministrit Haradinaj.
Nga ana tjetër, në tenderin e publikuar në faqen e KRPP-së përshkrim i shkurtër i lëndës së kontratës jepet vetëm “Furnizim me çizme tereni”, elementet tjera nuk përmenden. /Reporteri.net/.