Janë bërë më shumë se 23 javë që kur tuneli i Mitrovicës është futur në fazë të renovimit. 

Për vonesat që ishin bërë në hapjen e këtij tuneli javën e kaluar ishin organizuar edhe protesta në shenjë pakënaqësie për zvarritjen e punimeve.

Mirëpo, burime të Reporterit brenda Ministrisë së Infrastrukturës bëjnë të ditur se hapja e tunelit do të bëhet gjatë kësaj jave.

“Është vendosur dita e hapjes. Tuneli hapet brenda kësaj jave”, ka konfirmuar ky burim.

Ndryshe, për shkak të mosfunksionimit të këtij tuneli, qytetarët me automjetet e tyre shfrytëzojnë rrugën alternative për kyçjen në qytet, ndërsa brenda qytetit shpesh krijohen kolona.

Ky projekt që financohet nga Ministria e Infrastrukturës e që ka kosto rreth 380 mijë euro, ka filluar në nëntor 2018 dhe është paraparë të përfundojë brenda 60 ditësh.

Aktivistët e Vetëvendosjes kishin paralajmëruar protesta edhe para Ministrisë së Infrastrukturës në rast se tuneli nuk hapet deri më 1 maj. /Reporteri.net