Madridi mbetet një nga 5 kryeqytetet e BE-së që ende nuk e njeh pavarësinë e Prishtinës
Njohja e pasaportave të Kosovës nga ana e Spanjës, është hap që i shërben lëvizjes së lirë dhe është “fund i periudhës së paqartësisë së Madridit”.
Kjo s’është edhe njohje e shtetësisë së Kosovës nga shteti më i madh në pesëshen e Bashkimit Evropian.
“Spanja ende nuk e njeh Kosovën, sovranitetin apo pavarësinë e Kosovës, sepse ne nuk i njohim shpalljet e njëanshme të pavarësisë”, tha ministri i Jashtëm, José Manuel Albares, të hënën, në një deklaratë për media.
Vonesa e një vendimi të tillë përtej rrafshit politik përshkruhet edhe si mundësi e pakënaqësisë së komunitetit katalonas dhe atij bask, të cilët mund të ndërlidhin kërkesat e tyre për pavarësi me njohje të Kosovës. Ndërkaq edhe Greqia, Rumania, Sllovakia dhe Qiproja shihen si kundërshtuese të ngjashme për shkak të pakicave të mëdha etnike në territoret e tyre, të cilat mund të shprehin revoltë.
Partitë pro-pavarësisë katalanase, janë mbështetëse të shtetësisë së Kosovës. Por një zëdhënës i qeverisë spanjolle hodhi poshtë sugjerimet se lëvizja me pasaporta për Kosovën, ishte një tjetër lëshim për “secesionistët katalanas”.
Një zyrtar i partisë “Së bashku për Katalonjën”, tha se ishte “i lumtur për kosovarët” dhe i lumtur që mund të anulonte planet e veta për të promovuar çështjen e pasaportave në parlamentin spanjoll.
Qeveria rajonale e Katalonjës, e udhëhequr nga e Majta Republikane Katalonase, tha se ishte “plotësisht në përputhje me qëndrimin e institucioneve evropiane për njohjen dhe sovranitetin e Kosovës. Është Spanja ajo që ka një qëndrim të kundërt. Kjo është një anomali”.
Edhe pse kryeministri, Albin Kurti, tha se është “një javë me fillime të reja”, njohja nga vendet e tjera të BE-së mbetet aspak e garantuar.
Rumania, e cila ende nuk i është bashkuar zonës Shengen, ka hequr dorë nga kërkesat për viza për qytetarët e Kosovës, ndërsa këmbëngul se masa është “pa paragjykuar qëndrimet mbi statusin”.
Eksperti për Ballkanin Perëndimor në Universitetin Johns Hopkins në SHBA, Edward P. Joseph, e quajti vendimin spanjoll “një përparim”, duke paralajmëruar konvergjencë të mëtejshme në të gjithë NATO-n dhe BE-në për çështjen gjithëpërfshirëse të shtetësisë së Kosovës. “Kjo është kritike për stabilitetin rajonal”.
“Deri vonë, diplomatët spanjollë kishin ikur nga dhoma nëse paraqitej një zyrtar i Kosovës. Hapi i ri çel një sërë mundësish”, ka deklaruar Joseph.
Edhe njohja e targave të Kosovës nga ana e Serbisë, dhe gjithë procesi i gjatë është “çështje toksike”.
Pas një pauze prej më shumë se dy dekadash, Kosova gjithashtu filloi të regjistrojë përdoruesit e energjisë elektrike në veriun kryesisht me serb etnikë, ku njerëzit kishin shfrytëzuar energjinë elektrike të prodhuar në Serbi pa paguar për të, pasi ata refuzuan mbikëqyrjen rregullatore të Prishtinës.
Artikull i Financial Times. Përkthyer nga Gazeta Online Reporteri.net.