Thierry Henry do të jetë një nga prezantuesit e ceremonisë së “Topit të Artë” për vitin 2026, ka njoftuar revista “France Football”.
Ish-sulmuesi legjendar i Arsenalit dhe përfaqësueses së Francës do ta prezantojë ceremoninë së bashku me gazetaren sportive Kate Scott, të hënën e ardhshme në Londër.
Për Henryn, kjo do të jetë hera e parë që merr përsipër prezantimin e ceremonisë më prestigjioze individuale në futboll, duke pasuar holandezin Ruud Gullit.
Ndërkohë, Scott do të jetë pjesë e prezantimit për të dytin vit radhazi, pasi kishte qenë bashkëprezantuese edhe në edicionin e vitit 2025.
Londra pret për herë të parë ceremoninë
Edicioni i 70-të i “Topit të Artë” do të mbahet në teatrin London Palladium, duke shënuar herën e parë që kryeqyteti anglez organizon këtë ngjarje madhore të futbollit botëror.
Ceremonia e këtij viti shënon gjithashtu 70-vjetorin e themelimit të çmimit dhe pritet të mbledhë yjet më të mëdhenj të futbollit për të nderuar arritjet e tyre.
Henry dhe Scott tashmë kanë përvojë të përbashkët në televizion, pasi të dy prezantojnë emisionin “Golazo” në CBS Sports, ku diskutohet për Ligën e Kampionëve, së bashku me Jamie Carragherin dhe Micah Richardsin.
Henry: Londra është shtëpia ime
Ish-futbollisti francez nuk e fshehu kënaqësinë për këtë mundësi, duke theksuar lidhjen e veçantë që ka me Londrën dhe kulturën e saj të futbollit.
“Londra është shtëpia ime dhe kam një lidhje të veçantë me këtë qytet, kulturën e tij të futbollit dhe tifozët e pasionuar. Prezantimi i ceremonisë këtu, së bashku me kolegen dhe shoqen time Kate, është zgjedhja ideale. Pres një mbrëmje të jashtëzakonshme, ku do të festojmë talentet më të mëdha të futbollit botëror”, deklaroi Henry.
Edhe Kate Scott shprehu krenarinë për rikthimin në prezantimin e kësaj ceremonie, duke e cilësuar atë një mundësi të veçantë për të nderuar futbollistët që lënë gjurmë në sport dhe frymëzojnë gjeneratat e reja.
“Është kënaqësi të shohësh botën e futbollit të bashkohet për të festuar lojtarët që frymëzojnë gjenerata të tëra. Është nder për mua ta prezantoj edhe një herë këtë ngjarje legjendare”, u shpreh gazetarja britanike.
Ceremonia e “Topit të Artë” 2026 do të mbahet më 26 tetor në Londër, ku do të zbulohet fituesi i çmimit individual më të rëndësishëm në futboll.
