City mposht Palacen për ta rimarrë kreun, rikthen friken tek Liverpooli

Manchester City e ka vazhduar formën fantastike edhe ndaj Crystal Palace, duke u rikthyer në maje të Premier Ligës.


‘Qytetarët’ mposhtën ‘Shqiponjat’ me rezultat 1-3, falë përformancës fantastike të Raheem Sterling.

Ky i fundit shënoi fillimisht në minutën e 15-të, pas një asistimi perfekt të Kevin De Bruyne, i cili ishte njëkohësisht i pari për belgun këtë sezon.

Ekipi i Guardiola vazhdoi dominimin dhe golin e dytë e gjeti me autorin e njëjtë. Sterling (63′) shfrytëzoi mjaft mirë një pasim të Leroy Sane në zonë dhe realizoi për 0-2.

Vendasit befasuan me anë të Milivojevic (81′), i cili shënoi një gol fantastik nga gjuajtja e lirë.

Mirëpo, shumë shpejt Gabriel Jesus (90′) vulosi fitoren e mysafirët dhe shënoi për 1-3.

City rikthehet në krye me 84 pikë, një më shumë se sa Liverpool. Crystal Palace mbetet në vendin e 13-të me 39 pikë.

Javën e ardhshme, lideri i Premier Ligës luan derbin ndaj Tottenham në ‘Etihad Stadium’.