Kanë përfunduar katër ndeshjet e sotme të Superligës së Kosovës.

Kandidati për titullin kampion, Llapi realizoi fitore të madhe 4-1 ndaj Trepçës ’89 në Podujevë.

Vendasit u befasuan kur Lasine Traore (17’) shënoi për mysafirët, por vetëm pas pak minutave Ahmed Januzi (21’) baraspeshoi gjithçka.

Skuadra e Tahir Batatinës shkoi edhe më e relaksuar në pushim, kur harkimin e Mentor Zhdrellës e shfrytëzoi Behar Maliqi (45’) që shënoi për rezultatin 2-1.

Ahmed Januzi me dy gola në minutat e fundit kompletoi het-trikun dhe vulosi rezultatin 4-1, për t’i mbajtur gjallë shpresat e ‘Legjendave’ për një triumf në fund.

Llapi tubon 69 pikë në vendin e dytë, aq sa ka edhe Prishtina që për shkak të golaverazhit mban pozitën e tretë, ndërsa Feronikeli mbetet në krye me 71 pikë.

Ndërkohë garë e nxehtë po zhvillohet për t’i ikur barazhit.

Befasia e sotme vjen nga Gjilani, ku ekipi i Gentian Mezanit pësoi humbje në shtëpi nga Flamurtari me rezultat minimal dhe kësisoji futet në zonën e barazhit, shkruan lajmi.net.

Ferizaji fitoi me rikthim 3-1 ndaj Lirisë, që edhe matematikisht nga edicioni i ardhshëm garon në Ligën e Parë.

Ballkani realizoi fitore bindëse 0-3 në udhëtim te Kek-U, për t’i mbajtur gjallë shpresat për të mbetur edhe një sezon në elitën kosovare.

Më poshtë ua sjellim renditjen tabelare pas përfundimit të xhiros së 30-të.