Manchester City po përballet me një nga momentet më të vështira në historinë e klubit, pasi mund të përballet me një dënim të rëndë për shkeljet e pretenduara të rregullave financiare të Premierligës.
Klubi anglez është gjetur përgjegjës për 114 nga 115 akuzat lidhur me shkeljet financiare që i atribuohen periudhës 2009-2018.
Sipas akuzave, gjatë kësaj periudhe Manchester City dyshohet se ka raportuar në mënyrë të pasaktë të ardhurat e klubit, me shuma që kapin mbi 900 milionë funte.
Tash pritet përcaktimi i dënimit, me Manchester Cityn që mund të përballet me një gjobë të konsiderueshme, zbritje pikësh, kufizime të ndryshme ose edhe përjashtim nga Premierliga.
Rreziku për rënie në Championship lidhet me mundësinë e një penalizimi të madh me pikë. Nëse zbritja e pikëve do ta çonte Cityn në zonën e rënies, klubi do të detyrohej të luante në kategorinë e dytë të futbollit anglez.
Në skenarin më ekstrem, rregulloret parashikojnë edhe mundësinë e përjashtimit nga Premierliga. Një masë e tillë do të ishte më e rëndë sesa një rënie sportive në Championship, pasi rikthimi në sistemin e ligave angleze do të varej nga vendimet e autoriteteve përkatëse.
Manchester City ka kundërshtuar përfundimet e procesit, duke shprehur zhgënjim dhe befasi dhe duke këmbëngulur se klubi nuk ka kryer shkeljet për të cilat akuzohet.
Klubi ka paralajmëruar gjithashtu se do ta apelojë vendimin.
Ndërkohë, situatën po e ndjekin me vëmendje klubet rivale të Premierligës. Disa prej tyre kanë shqyrtuar edhe mundësinë e ndërmarrjes së veprimeve ligjore lidhur me dëmet që pretendojnë se kanë pësuar si pasojë e shkeljeve të supozuara.
