Sekretarja e përgjithshme e Partisë Demokratike të Kosovës, Vlora Çitaku, ka reaguar sot ashpër ndaj qasjes së Lëvizjes Vetëvendosje në raport me zbatimin e ligjeve dhe rregullave të Republikës së Kosovës.
Në një deklaratë për media, Çitaku theksoi se rregullat dhe ligjet nuk janë tavolinë sudeze, ku mund të përzgjidhen vetëm ato që i përshtaten dëshirës politike të dikujt.
“Ligjet dhe rregullat e Republikës së Kosovës nuk janë tavolinë sudeze. S’mund të vendosësh me to vetëm çfarë pëlqehet”, u shpreh ajo, duke kritikuar qasjen selektive që, sipas saj, Vetëvendosje po ndjek në një emërim të caktuar që i preferon.
Partia Demokratike e Kosovës ka kritikuar vazhdimisht mënyrën e qeverisjes nga ana e Vetëvendosjes, duke e akuzuar për kapje të institucioneve dhe për qasje të njëanshme në vendimmarrje.
Deputetja e Lidhjes Demokratike të Kosovës, Hykmete Bajrami pas dështimit të tentimit të 18-të për konstituimin e Kuvendit të Kosovës ka thënë se në Lëvizja Vetëvendosje e ka reduktu paaftësinë për konstituimin e Kuvendit në një problem teknik: “mbledhja e deputetëve çdo 48 orë”. Sipas saj në situatën në të cilën ndodhet vendi nuk do të duhej që ndërprerjet të ishin më shumë se 10 minutëshe.
“Fakti që Rregullorja e Kuvnedit përcakton se “Ndërprerjet gjatë seancës konstituive nuk mund të jenë mentë gjata se 48 orë” është aty në funksion të përshpejtimit të konstituimit të Kuvendit. Për LVV-në, ky është problem, dmth. problem që deputetëve po ju duhet të vijnë në Kuvend çdo 48 orë. Pra, për ata nuk është problem fakti që vendi është pa Kuvend funksional, pa Qeveri legjitime, pa institucione që u përgjigjen sfidave të qytetarëve, me projekte të bllokuara dhe qindra miliona euro donacione të humbura, problemi për LVV-në është orari i seancave. Në situatën në të cilën gjendemi seanca konstituive nuk do të duhej të ndërprehej më të gjatë se 10 minuta deri në konstituim.”, tha Bajrami.
Ajo u shpreh se LVV e ka obligim që të krijojë institucione ose deklarohet se nuk janë të aftë për bashkëpunim, në këtë mënyrë sipas saj tu hapej rruga alternativave të tjera.
“LVV, si partia e parë nuk ka obligim ndaj parive të tjera, por ka një obligim madhor: t’u japë qytetarëve institucionet ose të deklarohet që nuk janë të aftë as për bashkpunim dhe as për qeverisje dhe t’i hapin rrugë alternativave tjera. Ata kanë ikur nga përgjegjësia gjatë gjithë mandatit të kaluar dhe sot po vazhdojnë të bllokojnë çdo mundësi për stabilitet në vend. Kjo është papërgjegjësi, jo politikë.”, ka shkruar në Facebook, Bajrami.
Deputetja e AAK-së, Time Kadrijaj, pas dështimit të seancës, tha se kryesuesi Avni Dehari, kërkoi të konsultohen që seancat të zhvillohen çdo javë.
“Normal që u refuzua nga të gjitha partitë opozitare sepse është shkelje e Kushtetutës sepse me Kushtetutë thuhet çdo 48 orë, andaj ne nuk pranuam”, tha ajo.
Ajo bëri të ditur se sot do t’i dërgojnë në Kushtetuese komentet.
“Tash po nisemi për në Gjykatën Kushtetuese, është afati i fundit për dërgimin e komenteve. I kemi hartuar disa komente në mbështetje të asaj që kemi dërguar dhe arsyetimin se pse duhet të trajtohet me seriozitet”, tha ajo.
Deputetja e AAK-së, Time Kadrijaj, tha se si AAK sërish refuzuan kërkesën e VV-së për vazhdimin e seancave konstitutive nga një herë në javë.
Kadrijaj tha me ironi pas dështimit të 18, se Albulena Haxhiun ka mbetur ta propozojnë edhe për çmim ‘Nobel’ të dështimeve.
“U refuzua, nuk e pranuam propozimin e VV-së për seanca një herë në javë.
Veç me propozu për Nobel Alblena Haxhiun për dështime të një pas njëshme.
Kemi hartar edhe disa komente në GjK, arsyetime se pse duhet të trajtohet me seriozitet…”, tha ajo.
Deputeti i PDK-së, Nait Hasani e Albulena Haxhiu biseduan për disa minuta para Kuvendit.
Haxhiu nuk ka pranuar të komentojë se çka diskutuan.
“Është private, me qenë publike prononcohemi para mediave”, tha ajo.
Kurse, kryetari i Partisë Demokratike të Kosovës, Memli Krasniqi, e quajti “pyetje të kotë” atë që u mendua pas një bisede mes Haxhiut të VV-së dhe Nait Hasanit.
“Asnjë milimetër nga qëndrimet e partisë nuk lëviz askush i PDK-së”, tha Krasniqi.
“Pyetje e kotë, megjithëse respektin, sepse asnjë deputet i PDK-së nuk lëviz asnjë milimetër nga qëndrimet e partisë. VV dëshiron të krijojë narracione të përçarjes. Ne këtu jemi me i përfaqësu qëndrimet politike otna, dhe vendimet që i kemi marrë në organet e partisë. S’ka të bëjë me ne veç me zonjën Haxhiu, por me krjet anëtarët e qeverisë – s’kemi votë për asnjë nga ish-ministrat dhe zv/ministrat”, tha Memli Krasniqi.
Kryetari i PDK-së, Memli Krasniqi tha se deputetët mund të mblidhen çdo ditë për të provuar konstituimin e Kuvendit.
Ai tha se kryetari i LVV-së, Albin Kurti “s’ka interes që ta zhbllokojë situatën”.
“Sa na përket neve si PDK, unë besoj që nuk duhet të pritet as dy ditë, sepse rregullorja thotë brenda 48 orëve, e kjo mund të ndodhë edhe brenda 24 orëve dhe nuk do të ishte fare e gabueshme nëse mblidhemi çdo ditë, sepse ky do të ishte para se gjithash një detyrim që e kemi para votuesve që na kanë zgjedhur këtu dhe ndoshta një presion ndaj njëri-tjetrit që të dilet nga kjo situatë”, tha ai.
Krasniqi tha se në takimin me presidenten Vjosa Osmani i ka kërkuar asaj që “t’i drejtohet Gjykatës me pyetje kushtetuese”.
“Nuk e di a do ta bëjë një gjë të tillë”, por shtoi se “vullnetin e ka shprehur”.
Kemi mbetur shtet në gjendje emergjente esencialisht, meqenëse nuk kemi as qeveri
Z. Kurti s’ka interes me e zhblloku situatën.
Për të 18-tën herë në Kuvendin e Kosovës, edhe sot ka dështuar konstituimi i përbërjes parlamentare, të dalë nga zgjedhjet e mbajtura më 9 shkurt.
Deputeti Vetëvendosjes Avni Dehari, kryesuesi i Seancës Konstitutive ka ndërprerë sërish seancën e Kuvendit.
Ishin 52 vota për, një kundër dhe asnjë abstenim.
“Ndërpritet seanca, shihemi me 21 maj në orën 11:00”, tha Dehari.
Para vazhdimit të seancës, partitë edhe sot akuzuan njëra-tjetrën se po e bllokojnë dhe mbajnë peng Kuvendin.
Kujtojmë që seanca për konstituimin e Kuvendit ka dështuar 17 herë.
Lëvizja Vetëvendosje, që doli e para në zgjedhjet e 9 shkurtit, ka propozuar emrin e Albulena Haxhiut për kryetare. Emri i saj nuk po pranohet nga partitë që deri dje ishin në opozitë.
Partitë kanë kërkuar që LVV ta ndryshojë emrin e kandidatit. Ka qenë Aleanca për Ardhmërinë e Kosovës që ka propozuar dy emra konkret; Saranda Bogujevcin apo Shqipe Selimin.
Ndryshe, të enjten presidentja, Vjosa Osmani ka mbajtur një takim me liderët e partive, ku takimi ka përfunduar pa rezultate konkrete për dalje nga ngërçi politik.
Subjektet politike, PDK, LDK, AAK kanë deklaruar se nuk do ta votojnë Haxhiun për këtë pozitë. Ndërsa, LVV ka deklaruar se nuk do ta ndërrojë kandidaten e tyre.
Pas zgjedhjeve parlamentare të mbajtura më 9 shkurt, Kuvendi i Kosovës nuk ka arritur të konstituohet, pasi partia fituese, Lëvizja Vetëvendosje (LVV), nuk po siguron votat e mjaftueshme për të zgjedhur Kryetaren e Kuvendit. Kandidatja e propozuar nga LVV për këtë post, Albulena Haxhiu, nuk po arrin të marrë përkrahjen e nevojshme nga deputetët.
Seancat janë duke u mbajtur çdo 48 orë, por asnjëherë nuk është arritur kuorumi apo konsensusi i nevojshëm për të votuar udhëheqësen e legjislativit, çka po e mban të bllokuar procesin e konstituimit të Kuvendit dhe formimit të institucioneve të reja.
Kryetari i Nismës, Fatmir Limaj, tha se secili duhet ta marrë përgjegjësinë e vet dhe shtoi se rruga e vetme është përmes bisedimeve dhe marrëveshjeve politike.
“Mendoj që secili duhet t’i thirr përgjegjësisë së vet, forca tjera politike në Kosovë nuk ka, janë këto që janë, edhe nesër në secilin proces edhe në zgjedhje do të jenë të njëjtat forca politike dhe rruga e vetme që Kosova si shtet serioz është përmes bisedimeve dhe marrëveshjeve politike që pastaj partnerët zgjedhin njëri- tjetrin dhe kështu të përfundojë kjo situatë e pakuptimtë. Kosovën e presin shumë punë, shumë telashe, shumë probleme, tash e 6 muaj ne nuk kemi qeveri efektive, njerëzit kanë nevojë, vendi ka nevojë, na presin projekte, punë të mëdha, Kosovën e presin dinamika të reja të zhvillimeve dhe unë ftoj që të largohen nga egot personale, politike ku ta di unë, të paarsyeshme dhe të fillohet të përmbushet mandati që i kanë dhënë qytetarët”, tha Limaj.
Ai u pyet edhe nëse ka pasur ndonjë ftesë për takim.
“Tani për tani nuk ka ndonjë hap konkret dhe ftesë, përveç atyre që kemi parë në media. Natyrisht ne jemi të gatshëm të japim kontributin tonë për aq sa kemi mundësi dhe fuqi politike, por janë forcat e mëdha e kanë përgjegjësinë kryesore për të t’i dhënë rrugëzgjidhje”, tha ai.
Deputeti i AAK-së, Daut Haradinaj, ka thënë se s’pret ndryshim as sot, por Albin Kurti do të duhej të reflektonte për emrin e kandidates për kryetare të Kuvendit.
“Përderisa nuk ka një marrëveshje, atëherë mbetet e njëjta. Unë shpresoj që do të kemi kohë ta propozojmë kandidaten të cilën jemi thirrur në të, për Shqipen ose për Bogujevcin, jemi të gatshëm me ia dhënë votën.”
Haradinaj se se është antikushtetuese ndryshimi i procedurës së votimit.
“Është antikushtetuese ndryshimi i mënyrës së votimit dhe çdo deputet e ka obligative mos me ra pre e këtyre formave të manipulimit.”
Para fillimit të vazhdimit të seancës konstituive, deputeti i zgjedhur i LDK-së, Alban Zogaj, ka thënë se nuk pret asgjë ndryshe nga herët tjera.
“Sepse nuk mund të ketë ndryshime nëse nuk ka ndryshim të rrethanave. Ne nuk po shohim që ka ndryshim të rrethanave, madje nuk po shohim as qasje serioze për me ndryshu diçka. Siç shihet nuk ka kurrfarë urgjence, po vijmë çdo 48 orë, është bërë absurde. Unë një ditë e kam quajtur të turpshme sepse kjo kështu para qytetarëve edhe neve po na bën me u ndi keq”, tha ai.
“Ne kërkojmë qasje serioze në dalje nga ngërçi politik, e qasja serioze nënkupton komunikim, komunikim i partisë së parë me të tjerët në mënyrë që me dalë prej ngërçit”, tha ai.
Zogaj kur u pyet nga gazetarët për refuzimin e VV-së nga LDK, ai tha se presin që partia e parë t’i ftojë partitë tjera.
“Ne presim që me i ftu edhe të tjerat, le të vazhdon me të tjerat. Ne e kemi refuzu, dëshirojmë me qëndru në pozicionin tonë sepse ekziston një hendek i madh mes LDK-së dhe VV-së, të cilin hendek e kemi shpjeguar shumë herë”, tha ai.
Deputeti i LVV-së, Faton Peci para mediat lidhur me risitë në Kuvend ai tha se VV është pushtet kujdestar.
Peci në një deklarim për media të hënën paralajmërojë se edhe në këtë seancë do të shkojnë me skenarin e njëjtë atë të votimit të fshehtë.
“Ata që e kanë në dorë me pasë risi, ne jemi pushteti kujdestar do të thotë ajo që mundemi me pritë ndryshim, pjesa kryesore i takon pjesës së partive, PDK, LDK, AAK. Të gjithë deputetë tanë që po marrin pjesë votojnë në funksion në debllokim të Kuvendit”, tha Peci.
Ai ndër të tjera shtoi se kjo është mënyra më e mirë për të dal nga kriza, pasi siç ka thënë ai shumë deputetë në biseda private thonë se i vret ndërgjegjja që nuk po konstituohet Kuvendi.
Përparim Gruda, deputet i PDK-së ka thënë para vazhdimit të seancës që as sot nuk pret ndonjë zgjidhje.
Sipas tij Vetëvendosje po mban peng institucionet e Kosovës, shkruan gazeta online Reporteri.net.
Ai tha se PDK nuk voton nën diktat dhe nuk voton në votimin e fshehtë që sipas tij është kundërkushtetues.
Gruda tha se nëse duhet vota e PDK-së, duhet të ndërrohet kandidati
“Nuk pres që do të ketë ndonjë ndryshim. Është e qartë që partia që nuke ka fituar shumicën, pretendon që ka fituar shumicën absolute dhe mendoj që i ka marrë peng institucionet e Kosovës. Ju e dini që kryemeministri dhe ministrat janë në qeveri në mënyrë të kundërligjshme. Situatë absurde ku partia që ka dalë e para në zgjedhje ka vendosur t’i jap prioritet një emri të përvecëm, Albulena Haxhiut karshi institucioneve dhe interesave të qytetarëve të Kosoëvs. “, tha a i.
Gruda tha se një njërën anë janë qytetarët që presin të adresohen problemet e tyre dhe në anën tjetër një emër i përveçëm, ai i Albulena Haxhiut.
“Pra, në njërën anë janë qytetarët e Kosovës që presin të konstituohen institucionet dhe të adresohen problemet e tyre që lidhen me energjinë elektrike, çmimet e larta, pagat e ulëta, pensionet e ulëta dhe në anën tjetër një emër i përveçëm, Albulena Haxhiu që mban peng adresimin e problemeve të tyre. Pyetja fundamentale që bënë cdokush sot është nëse Haxhiu zgjidhet sot kryetare a ka VV projekt si do t’i rrisë pagat, si do të ulë cmimet? A i ndryshon jeta një qytetari të Kosovës nëse Haxhiu zgjidhet kryetare.”, tha Gruda.
Kuvendi i Kosovës sot do të mblidhet për të 18-të herë me radhë në përpjekje për të konstituar Kuvendin e Kosovës, shkruan Reporteri.net.
Ndërsa Lëvizja Vetëvendosje përmes kryesuesit të seancës të shtunën doli me propozim që seanca të mbahet një herë në javë e jo çdo 48 orë, bashkëkryesuesja e seancës që vije nga PDK, doli kundër këtij propozimi, duke thënë se janë të gatshëm të punojnë çdo ditë, shkruan Reporteri.net.
Kryesuesi i Kuvendit të Kosovës, Avni Dehari, të premten pas dështimit të seancës tha se propozimi që seanca të mbahet një herënëjavë e ka bërë pasi nuk ka kuptim deputetët të vijnë çdo 48 orë në Kuvend kur rezultati po del i njejtë.
Dehari tha se pret që grupet parlamentare të sjellin një vendim për këtë propozim.
“Ata po deklarohen para medieve sepse nuk ka kuptim që të vijnë çdo 48 orë, për shkak se rezultati po del i njëjtë dhe unë e pashë të nevojshme që të konsultohem me ta, nëse janë të mendimit ata shprehen mendimin që të konsultohen me grupet e tyre parlamentare dhe në seancën tjetër të sjellin një vendim. Rregullorja obligon që t`i thërrasësh deri sa nuk ka një zgjidhje, natyrisht do të ishte më mirë që të kishte zgjidhje, por derisa nuk ka zgjidhje detyrohesh t`i thërrasësh çdo 48 orë”, ka deklaruar Dehari dje pas dështimit të konstituimit të Kuvendit.
Por, bashkëkryesuesja e seancës, deputetja më e re e Kuvendit që vije nga PDK, Sala Jashari, ka dalë kundër këtij propozimi duke thënë se kërkesa e Vetëvendosjes që seancat të mbahen një herë në javë, tregojnë dëshirën e kësaj partie për ta zgjatur bllokadën institucionale.
Ajo dje përmes një postimi në Facebook ka shkruar se PDK është e gatshme të jetë e pranishme çdo ditë në Kuvend, për të zhbllokuar situatën, shkruan Reporteri.net.
“Kërkesa e VV-së për ta kufizuar mbajtjen e seancave vetëm një herë në javë flet më shumë se çdo deklaratë tjetër që mund të jepet. Kjo kërkesë tregon qartë dëshirën dhe nevojën për ta zgjatur bllokadën institucionale — një dëshmi e mungesës së vullnetit dhe aftësisë për të krijuar institucionet e reja”.
“Ne nuk kërkojmë seanca një herë në javë, as çdo 48 orë. Ne jemi të gatshëm të jemi të pranishëm çdo ditë, në çdo moment, në Kuvendin e Kosovës, për të punuar drejt zhbllokimit të situatës. Kjo kërkesë e sotme është një tjetër alarm zgjimi për të gjithë. Është e qartë që VV-ja po përpiqet të kontrollojë dhe kurdisë procesin vetëm kur i konvenon asaj!”, ka shkruar ajo.
Seanca sot është thirrë për në ora 10:30. /Reporteri.net/.
Reporteri.net është gazetë online e lajmeve nga vendi dhe bota. Qëllim kryesor ka informimin e drejtë, të paanshëm dhe të shpejtë. Reporteri.net, në pronësi të “R Media L.L.C.”, është themeluar në mars të vitit 2019 dhe drejtohet nga gazetarët Bekim Kabashi dhe Mentor Gjergjaj.
E-Mail: info@reporteri.net
Marketing: marketing@reporteri.net
Adresa: Rr. UÇK, Nr. 102/11 10000 Prishtinë, Kosovë
