Një rreshter dhe katër zyrtarë policorë, të dyshuar për vrasjen e 27-vjeçarit Agon Zejnullahu në natën mes 6 dhe 7 korrikut, kanë dalë para Gjykatës Themelore të Prishtinës, dega në Lipjan.

Seanca dëgjimore tashmë ka përfunduar dhe Gjykata pritet të marrë vendim rreth kërkesës së Prokurorisë për paraburgim, shkruan gazeta online Reporteri.net.

Rasti që ndodhi në orët e para të 7 korrikut në Lipjan ka ngjallur reagime të shumta në vend dhe thirrje për transparencë, përgjegjësi institucionale dhe hetim të pavarur.

Pesë zyrtarët policorë janë ndaluar për 48 orë nën dyshimin për “Vrasje nga pakujdesia”, ndërkaq Inspektorati Policor i Kosovës ka rekomanduar suspendimin e tyre.

Prokuroria Themelore e Prishtinës ka kërkuar caktimin e masës së paraburgimit ndaj pesë policëve të dyshuar. /Reporteri.net/