Pas vizitës së Volodymyr Zelensky-t, tani është radha e Benjamin Netanyahu-t.

Kryeministri izraelit ndodhet në Mar-a-Lago, Florida, për t’u takuar me presidentin amerikan Donald Trump, të cilin e quan “një nga miqtë më të mirë që Izraeli ka pasur ndonjëherë në Shtëpinë e Bardhë”.

Takimi, i kërkuar nga vetë Netanyahu, është cilësuar nga ekspertët një “samit emergjence”. Netanyahu ka udhëtuar pa gazetarë dhe nuk ka dhënë asnjë deklaratë deri tani.

Reklamë

Sipas Axios, ai ka humbur mbështetjen e pjesës më të madhe të administratës amerikane, nga senatorë e negociatorë të ndryshëm, ndërsa i ka mbetur vetëm Trump. Presidenti amerikan kërkon përparim në fazën e dytë të armëpushimit në Gaza dhe synon të shpallë në janar një Forcë Stabilizimi Ndërkombëtare dhe krijimin e një bordi paqeje, por Netanyahu e kushtëzon nisjen e fazës me kthimin e pengut të fundit dhe çarmatosjen e Hamasit.

Vizita në Florida mund të shërbejë gjithashtu për të siguruar mbështetje politike dhe për të kënaqur pjesën më të djathtë të koalicionit të tij, ndërsa strategjia e tij e ashpër për Lindjen e Mesme përballet me nevojën amerikane për stabilitet.

Në Liban, Izraeli kërcënon me ofensivë nëse Hezbollah nuk deponon armët deri në fund të vitit, ndërsa në Iran, Netanyahu shqetësohet për prodhimin e raketave balistike dhe synon të diskutojë opsionet ushtarake me Trump. Ai madje publikoi një video të krijuar me inteligjencë artificiale ku shihet duke pilotuar një bombardues amerikan B-2 me presidentin amerikan.

Takimi shërben edhe për fushatën elektorale të Netanyahut për zgjedhjet e tetorit. Trump është jashtëzakonisht popullor në Izrael, dhe Netanyahu shpreson të përdorë këtë mbështetje për të rritur sondazhet.

Fushata pritet të jetë e gjatë dhe e ndërlikuar, ndërsa grupi iranian i hakerave Handala pretendon se ka marrë nën kontroll telefonin e shefit të stafit të Netanyahut dhe do të publikojë informacione lidhur me skandalin “Qatargate” që e ndjek prej kohësh kryeministrin izraelit.

Reklamë