Kuba pranoi këtë të enjte mbetjet e 32 ushtarëve të saj të vrarë në luftime gjatë sulmit amerikan ndaj Venezuelës dhe kapjes befasuese të presidentit Nicolas Maduro, duke u bërë nderimet trupave si “heronj” kombëtarë.
Mbetjet e ushtarëve, pjesëtarë të forcave të armatosura dhe agjencive të inteligjencës kubane, mbërritën herët të enjten në aeroportin ndërkombëtar të Havanës, në arkivole të mbuluara me flamurin kuban.
Kuba ka ofruar disa masa sigurie për Maduron që kur ai erdhi në pushtet. Nuk ishte e qartë sa prej kubanezëve të rënë po ruanin presidentin venezuelian kur humbën jetën, ose sa mund të kenë vdekur diku tjetër.
Qeveria komuniste e Kubës më herët këtë muaj tha se 32 qytetarë të saj kishin vdekur gjatë sulmit amerikan në kryeqytetin venezuelian, Caracas.
Një bandë ushtarake me uniforma të bardha luajti himnin kombëtar të Kubës në pistë gjatë një ceremonie të mbikëqyrur nga presidenti Miguel Diaz-Canel, ish‑udhëheqësi 94‑vjeçar Raul Castro dhe zyrtarë të lartë ushtarakë.
Gjenerali Lazaro Alberto Alvarez tha se trupat e rënë përfaqësonin angazhimin e palëkundur të Kubës ndaj atdheut dhe aleatëve të saj.
Tensionet përshkallëzohen mes SHBA-ve dhe Kubës këtë javë
“Nëse ky kapitull i dhimbshëm i historisë ka treguar diçka, është se imperializmi mund të zotërojë armët më të sofistikuara, mund të imponojë pasuri të mëdha materiale, mund të blejë mendjet e lëkundura, por ka një gjë që kurrë nuk do të mund ta blejë: dinjitetin e popullit kubanez,” tha ai, citon Reuters.
Më pas një kortezh transferoi trupat në ministrinë e forcave të armatosura përgjatë një prej bulevardeve kryesore të kryeqytetit, ku mijëra njerëz bënin homazhe, valëvitnin flamuj dhe përshëndetnin.
Maduro, 63 vjeç, dhe bashkëshortja e tij Cilia Flores u kapën nga forcat amerikane në Caracas të shtunën dhe u dërguan në Shtetet e Bashkuara. Maduro po mbahet në një qendër paraburgimi në New York nën akuza për drogë.
Tensionet mes SHBA-ve dhe Kubës u përshkallëzuan këtë javë pasi presidenti amerikan Donald Trump i tha Kubës se do të ndërpriste naftën dhe paratë venezueliane që mbërrijnë në ishull, duke paralajmëruar Havanën të bëjë një marrëveshje para se të jetë “shumë vonë.”
Komenti i Trump-it nxiti një përgjigje sfiduese nga Diaz-Canel, i cili tha se Kuba do të mbrojë atdheun e saj “deri në pikën e fundit të gjakut.”
Kuba ka planifikuar një marshim të premten përpara ambasadës amerikane për të protestuar kundër agresionit amerikan në Venezuelë.
