Bisedimet e minutës së fundit po vazhdojnë me Shtëpinë e Bardhë, ndërsa udhëheqësit në Capitol Hill po përpiqen të shmangin një mbyllje të pjesshme dhe të kushtueshme të qeverisë në fund të javës, raporton CNN, përcjell Reporteri.net.
Demokratët votuan pasditen e së enjtes kundër avancimit të një pakete financimi me gjashtë projektligje, pasi kërkojnë lëshime nga republikanët dhe Shtëpia e Bardhë lidhur me zbatimin federal të ligjeve të imigracionit, në këmbim të mbështetjes së tyre.
Disa orë më vonë, negociatat u ngushtuan në një pikë të vetme bllokuese: sa kohë duhet të zgjatet përkohësisht financimi për Departamentin e Sigurisë Kombëtare (DHS), për të lënë kohë për arritjen e një marrëveshjeje afatgjatë që synon frenimin e praktikave të Shërbimit të Imigracionit dhe Doganave të SHBA-së (ICE), sipas disa senatorëve nga të dyja partitë.
Shpejtësia me të cilën kanë përparuar bisedimet nënvizon dëshirën e Shtëpisë së Bardhë për të shmangur një tjetër mbyllje, si edhe një pranim të heshtur nga republikanët për rreziqet politike të mosveprimit, në mes të reagimeve të forta publike ndaj taktikave të ashpra të ICE-it.
“Shpresojmë që të mos kemi një mbyllje”, tha Presidenti Donald Trump gjatë një mbledhjeje të kabinetit.
“Mendoj se po i afrohemi një zgjidhjeje. Nuk besoj se as demokratët duan ta shohin këtë.”
Demokratët thonë se nuk do të mbështesin një zgjatje afatshkurtër të financimit për DHS-in që zgjat më shumë se dy javë. Administrata Trump, ndërkohë, po kërkon për një zgjatje prej gjashtë javësh./Reporteri.net
