Numri i udhëtarëve që përdorin transportin publik pa biletë të vlefshme në Zvicër ka arritur një rekord të ri në vitin 2025. Sipas të dhënave zyrtare, mbi 1.1 milion raste janë regjistruar në sistemin qendror SynServ, ndërsa pothuajse gjysma e tyre janë shkelës të përsëritur.

Gjatë vitit të kaluar, 1,173,295 persona u kapën duke udhëtuar pa biletë të vlefshme ose me biletë pjesërisht të vlefshme në trena, autobusë, tramvaje dhe mjete të tjera të transportit publik. Këtë e ka konfirmuar Alliance SwissPass, raporton mediumi Watson.

Pse është rritur numri i shkeljeve?

Autoritetet theksojnë se kjo rritje duhet parë në kontekst:

Numri i udhëtarëve është rritur ndjeshëm krahasuar me vitin e kaluar

Kontrollet janë bërë më të shpeshta nga kompanitë e transportit

Kompania më e madhe, SBB (Hekurudhat Federale Zvicerane), nuk jep detaje mbi shpeshtësinë e kontrolleve, duke deklaruar se kjo bëhet për të ruajtur “efektin parandalues”.

Kush udhëton më shpesh pa biletë?

Sipas statistikave të Alliance SwissPass:

62.1% e shkelësve janë persona të moshës 26–64 vjeç

Vetëm 4.3% janë mbi moshën 65 vjeç

Në 46% të rasteve, personat ishin tashmë të regjistruar në sistem, pasi ishin kapur të paktën tre herë më parë pa biletë të vlefshme

Rregullat dhe gjobat

Rregullat për udhëtimin pa biletë janë të njëjta në të gjithë Zvicrën dhe rregullohen nga Tarifa 600.

Me biletë pjesërisht të vlefshme:

Shkelja e parë: 70 franga

Shkelja e dytë: 70 + 40 franga

Shkelja e tretë: 70 + 70 franga

Pa biletë të vlefshme:

Shkelja e parë: 90 franga

Shkelja e dytë: 90 + 40 franga

Shkelja e tretë: 90 + 70 franga

Dëme të mëdha financiare

Sipas zëdhënëses së Alliance SwissPass, Michaela Ruoss, shmangia e pagesës së biletave i shkakton sektorit të transportit publik rreth 200 milionë franga zvicerane humbje në vit.

Nga ana tjetër, SBB thekson se këto humbje në fund mbulohen nga udhëtarët që paguajnë rregullisht biletën dhe nga publiku i gjerë./Albinfo.ch/