Rusia do të vazhdojë të respektojë kufijtë për raketat dhe kokat bërthamore të përcaktuara nga traktati “New Start”, edhe pse marrëveshja ka skaduar zyrtarisht, për aq kohë sa Shtetet e Bashkuara veprojnë njësoj.

“SHBA nuk i ka dhënë asnjë përgjigje zyrtare nismës së presidentit Putin për të vazhduar vullnetarisht respektimin e kufijve të traktatit për armët strategjike. Qëndrimi ynë është i qartë: moratoriumi nga ana jonë mbetet në fuqi, por vetëm për aq kohë sa Shtetet e Bashkuara nuk i tejkalojnë këta kufij. Në përgjithësi, ne do të veprojmë me përgjegjësi dhe kujdes, bazuar në vlerësimin e përditshëm të politikës ushtarake amerikane dhe të situatës strategjike globale”, deklaroi ministri i Jashtëm rus, Sergei Lavrov.

Skadimi i marrëveshjes ka rritur shqetësimet për një garë të re armatimesh bërthamore mes Rusisë, Shteteve të Bashkuara dhe Kinës. Edhe pse Kina ka shumë më pak koka bërthamore se dy fuqitë e tjera, ritmi i armatosjes së saj po rritet.

Megjithatë, analistët vlerësojnë se Moska nuk ka interes të hyjë në një garë të kushtueshme armatimesh, në një kohë kur buxheti shtetëror është nën presion për shkak të luftës së vazhdueshme në Ukrainë.

Në këtë kontekst, deklaratat e Lavrov synojnë të ruajnë një minimum stabiliteti strategjik, pavarësisht mungesës së një marrëveshjeje formale.