Presidenti i SHBA-ve, Donald Trump, ka urdhëruar që të gjitha agjencitë federale të ndalojnë menjëherë përdorimin e teknologjisë së kompanisë së inteligjencës artificiale Anthropic.

Në një postim në Truth Social, Trump deklaroi se qeveria amerikane “nuk ka nevojë dhe nuk do të bëjë më biznes” me kompaninë, vetëm pak para afatit që Pentagoni i kishte vendosur Anthropic për t’i dhënë akses të plotë në mjetet e saj të AI.

Vendimi erdhi pasi drejtuesi i Anthropic, Dario Amodei, refuzoi kërkesat e Departamentit të Mbrojtjes, duke shprehur shqetësimin se teknologjia e kompanisë mund të përdorej për “mbikëqyrje masive brenda vendit” dhe për “armë plotësisht autonome”. Sipas Trump, mjetet e Anthropic do të hiqen gradualisht nga të gjitha kontratat qeveritare brenda gjashtë muajve.

Kompania kishte paralajmëruar më herët se, nëse Departamenti i Mbrojtjes do të ndërpriste bashkëpunimin për shkak të kufizimeve të sigurisë që ajo mban, do të bashkëpunonte për një tranzicion të qetë drejt një ofruesi tjetër. Megjithatë, Trump paralajmëroi pasoja civile dhe penale nëse kompania nuk do të bashkëpunonte gjatë periudhës së ndërprerjes.

Edhe pse Anthropic kundërshton përdorimin e teknologjisë së saj për mbikëqyrje masive apo armë autonome, Departamenti i Mbrojtjes ka deklaruar se nuk ka kërkuar përdorim për këto qëllime, por kërkon që kompania të pranojë “çdo përdorim të ligjshëm” të mjeteve të saj. Aktualisht, në SHBA ka pak ligje që rregullojnë në mënyrë specifike përdorimin e inteligjencës artificiale.

Në mbështetje të qëndrimit të Amodei doli edhe drejtuesi i OpenAI, Sam Altman, i cili në një memo të brendshme theksoi se edhe OpenAI ka “vija të kuqe” të ngjashme, duke përjashtuar përdorimin e teknologjisë për mbikëqyrje të brendshme apo armë autonome sulmuese.

Anthropic dhe OpenAI janë rivale direkte në tregun e inteligjencës artificiale. Amodei ishte një nga figurat kyçe të OpenAI përpara se të largohej dhe të themelonte Anthropic, pas mosmarrëveshjeve me Altman.

Në vitin 2024, Anthropic lidhi një partneritet me Palantir Technologies, duke lejuar përdorimin e modelit të saj Claude në produktet qeveritare të kompanisë. Kontrata e saj me Pentagonin është pjesë e një marrëveshjeje me vlerë rreth 200 milionë dollarë. Vlerësimi i fundit i kompanisë, i bërë publik këtë muaj, e çon vlerën e saj në rreth 380 miliardë dollarë.

Ndërkohë, grupe që përfaqësojnë rreth 700 mijë punonjës të teknologjisë në kompani si Amazon, Google dhe Microsoft nënshkruan një letër të hapur duke u bërë thirrje punëdhënësve të tyre të mos pranojnë kërkesa që lidhen me përdorime ushtarake të teknologjisë së AI.

Debati mes qeverisë amerikane dhe kompanive të inteligjencës artificiale po thellohet, duke e kthyer çështjen e përdorimit të AI në sektorin e mbrojtjes në një përballje të hapur mes sigurisë kombëtare dhe kufijve etikë të teknologjisë.