Sipas raportimit të Reuters, një zyrtar i lartë izraelit ka deklaruar se Udhëheqësi Suprem i Iranit, Ali Khamenei, është i vdekur dhe se trupi i tij është gjetur.

Zyrtarë të tjerë izraelitë kanë bërë deklarata të ngjashme për disa media, por nga Irani ende nuk ka konfirmim zyrtar. Sipas mediave izraelite, trupi i tij është gjetur në rrënojat e pallatit.

Channel 12 raportoi se kryeministrit Benjamin Netanyahu i është paraqitur dokumentacion lidhur me trupin e Khameneit.

Megjithatë, nga Teherani nuk ka ende asnjë reagim apo konfirmim zyrtar për fatin e tij.

Ndërkohë, agjencia iraniane Tasnim News Agency raportoi se shtatë raketa goditën zonën pranë pallatit presidencial dhe kompleksit të udhëheqësit suprem në Teheran. Pamjet satelitore thuhet se tregojnë se rezidenca është shkatërruar plotësisht.

Më herët, mediat iraniane kishin raportuar se Khamenei ishte larguar nga Teherani dhe ishte transferuar në një vend të sigurt. Gjithashtu u raportua se presidenti iranian Masoud Pezeshkian është “i sigurt dhe në gjendje të mirë”./Reporteri.net/